Makiej: Treba hladzieć de-fakta, čyj Krym siońnia, i zachavać cełasnaść astatniaj častki Ukrainy

Ministr zamiežnych spravaŭ Biełarusi Uładzimir Makiej daje pres-kanfierencyju ŭ ofisie vydańnia «Rośsija siehodnia» ŭ Maskvie. Ź Minskam byŭ naładžany telemost.

«Heta absalutna naturalna dla braterskich krain. U mianie napiaredadni adbyłasia cikavaja razmova z Kisialovym, u nas mnostva płanaŭ, jakija buduć vyhadnyja abiedźvium krainam.

Pamiž Biełaruśsiu i Rasijaj supiarečnaściaŭ ŭ zamiežnapalityčnym nakirunku niama. Chacia asobnyja kroki i rašeńni stali abrastać mifami i traktoŭkami. Sustreča važnaja, kab rasstavić kropki nad «i», — skazaŭ Uładzimir Makiej.

My zychodzim z taho, čyj Krym de-fakta

«U palitycy treba zychodzić z realij. Naš prezident užo niekalki razoŭ vykazvaŭsia na hetuju temu, što my pavinny zychodzić z taho, čyj na siońnia de-fakta Krym. I vybudoŭvać palityku, i ŭzajemadziejańnie ź imi.

U nas z Krymam, darečy, i ŭ minułyja časy, i ciapier handlova-ekanamičnyja adnosiny raźvivalisia nie vielmi. Moža być, praz łahistyku ci niejkija inšyja aśpiekty. Turysty z zadavalnieńniem naviedvali i, napeŭna, buduć naviedvać hety kutok. Bo tam sapraŭdy pryroda cudoŭnaja i ŭmovy dla adpačynku.

Inšy momant, što łahistyka krychu ŭskładniłasia. Kab trapić u Krym, treba vybirać bolš ciažkija šlachi. Praz Ukrainu — niemahčyma. Kali jechać praz Rasiju, to nielha viartacca praz Ukrainu. My papiaredžvajem pra heta našych hramadzian.

Što datyčyć pryznańnia-niepryznańnia, to Krym — heta nie dziaržava, jakuju treba pryznavać. Ad nas nichto i nie patrabuje pryznańnia.

My zychodzim z taho, čyj Krym siońnia de-fakta. Heta nie značyć, što my z čymści zhodnyja ci z čymści niazhodnyja. My ličym, što ciapier hałoŭnaja zadača — heta zachavać terytaryjalnuju cełasnaść i nieparušnaść astatniaj častki Ukrainy. I dla hetaha my pradstavili pieramoŭnuju placoŭku».

Sajuznaja dziaržava siabie apraŭdała

«Praces stanaŭleńnia sajuznaj dziaržavy idzie 20 hadoŭ. Ci apraŭdalisia čakańni? Tak. Bo my stvaryli roŭnyja pravy dla našych hramadzian. Rasijanin moža pryjechać u Biełaruś, uładkavacca na pracu, kupić kvateru, atrymać miedycynskuju dapamohu. Byvajuć sprečki, ale chto kaho čubić, toj taho i lubić. Važna zachavać usie stanoŭčyja momanty sajuznaj dziaržavy. Chočacca bačyć niejki vianiec sajuznaj dziaržavy, ja vas razumieju, mahčyma, niekali jon źjavicca».

Asablivaj pazicyi pa Nahornym Karabachu ŭ Biełarusi niama

«Nijakaj asablivaj pazicyi Biełarusi pa Nahornym Karabachu niama i nie było. My ličym, što sprečnyja momanty treba vyrašać za stałom pieramovaŭ, a nie strełami. Dla nas azierbajdžanski i armianski narody — braty. My chacieli, kab jany znajšli šlachi rašeńnia za stałom pieramovaŭ. Tyja ci inšyja dziaržavy sprabujuć traktavać mižnarodnyja damovy jak chočuć. Niechta kaža, što nam važnaja terytaryjalnaja cełasnaść. Niechta — prava nacyi na samavyznačeńnie. Samaje važnaje zabiaśpiečyć mirnaje žyćcio žycharoŭ».

Biełaruskaja mova — mova našaj nacyi

«Kali nas paprakajuć, što my zajmajemsia antyrusifikacyjaj, to heta absalutna nie maje hleby pad saboj. U nas dźvie dziaržaŭnyja movy. Adnak tak skłałasia histaryčna, što my bolš havorym pa-rusku. Biełaruskaja — heta mova našaj nacyi. My nie toje, što pavinny zabyvać jaje, ale i raźvivać».

U nas jość pomniki i Suvoravu, i Kalinoŭskamu

«U Biełarusi niama raźvićcia nacyjanalizmu ci niejkaj antyrusifikacyi, i być nie moža. Chtości nazyvaje Suvorava viešalnikam, chtości Kalinoŭskaha — nacyjanalistam. Idzie narmalnaja dyskusija. U nas jość pomniki i Suvoravu, i Kalinoŭskamu. Nie pomniki vinavatyja ŭ našych biedach, a ludzi. Kali niechta sprabuje abvinavacić Biełaruś u raspalvańni nacyjanalizmu, to heta podła».

Pra biełaruskija kivi i krevietki

«Tavarazvarot z Rasijaj upaŭ na 30%, niahladziačy na sankcyi na jeŭrapiejskija tavary. Ale my damaŭlalisia, što padstavim plačo Rasii i naraścim pastaŭki ŭ Rasiju małaka, miasa. My nie zavalili Rasiju biełaruskimi tavarami. Biełaruskija kivi, krevietki? My damovilisia, kali tavar pierapracoŭvajecca ŭ Biełarusi, to jon ličycca biełaruskim. Heta damoŭlenaść pamiž dvuma bakami».

Pra raźvićcio biełaruska-jeŭrapiejskich adnosin

«My znachodzimsia ŭ centry Jeŭropy, my tut i zastaniemsia. Z Rasijaj nas źviazvaje vielmi-vielmi šmat supolnaha. I historyja, i ekanomika, i palityka. Rasija — dla nas hałoŭny sajuźnik. Ale heta nie značyć, što nie pavinny raźvivać adnosiny ź inšymi bakami. Dla nas Jeŭrasajuz — važny ekanamičny partnior. My majem namier raźvivać adnosiny ź jeŭrapiejskimi krainami nie za košt Rasii. My viedajem, što Rasija ŭ ciažkija momanty pryjdzie nam na dapamohu».

Nie treba ŭsprymać vizit Karpientera jak vypad suprać Rasii

Pra niadaŭni vizit u Minsk pradstaŭnika Ministerstva abarony ZŠA spadara Karpientera, a taksama ab reakcyi na jaho rasijskich ŚMI.

«My ž nie vykazvajem pretenzii, kali pradstaŭniki Rasii majuć sustrečy z pradstaŭnikami Jeŭrasajuza, NATA.

Nie treba ŭsprymać heta jak vypad suprać Rasii. U nas doŭha nie było zusim nijakaha vajskovaha supracoŭnictva z ZŠA. My chacieli atrymać adkazy ad pradstaŭnika ZŠA, NATA na važnyja biahučyja pytańni. Heta sproba adnavić narmalnyja vajskovyja stasunki z krainami NATA i ZŠA».

• 0
• 0
• 0
• 0
• 0
• 0
• 0
• 0