El Pais: Čaves i Biełaruś mieli ŭzbrojvać FARC
Zhodna ź infarmacyjaj hišpanskaj hazety, venesuelski prezydent Uha Čaves sprabavaŭ uzbroić kalumbijskich paŭstancaŭ z dapamohaj Biełarusi. Hetyja mierkavańni zasnavanyja na dakumentach, znojdzienych u kamputary zabitaha FARCaŭskaha lidera.
Venesuelski prezydent Uha Čaves, jak miarkujecca, sprabavaŭ uzbroić kalumbijskich paŭstancaŭ z dapamohaj Biełarusi, – paviedamiła ŭ subotu hazeta El Pais, cytujučy dakumanty z kamputara zabitaha paŭstanckaha lidera.
Hišpanskaja hazeta cytuje je-mejł Ivana Markiesa, lidera Revalucyjnych uzbrojenych siłaŭ Kalumbii (FARC), datavany 8 lutaha, u jakim havorycca, što Čaves razhladaŭ ź biełaruskimi ŭładami mahčymaść pradstaŭleńnia zbroi FARC.
Miarkujecca, što je-mejł byŭ znojdzieny ŭ zdabytym kamputary namieśnika kamandujučaha FARC Raula Rejesa, jaki byŭ zabity ŭ sakaviku, – piša El Pais.
U častkova zakadavanym pasłańni ŭzhadvaŭsia niechta aznačany tolki jak «biełaruski siabar».
Hazeta cytuje častkova zakadavany list, datavany 8 lutaha: «Biełaruski siabar prapanavaŭ realizavać pakiet na čornym rynku, kab paźbiehčy prablemaŭ. 17-ha hetaha miesiaca u Karakas pryjedzie vysoki pradstaŭnik hetaha siabra, kab udakładnić śpis. Anioł paprasiŭ nas prysutničać, kab my asabista sustrelisia z delehatam. Heta vielmi važna».
«Anioła» hazeta rasšyfroŭvaje jak Čavesa. «Pradstaŭnikom siabra» ža ličyć Viktara Šejmana. «Šejman byŭ adnym z tych, chto prabivaŭ padpisanyja letaś kantrakty na pastaŭku zbroi ŭ Venesuełu na 720 młn eŭra», — piša hazeta.
Nahadajem, što 15—19 lutaha adbyŭsia aficyjny vizyt u Venesuełu biełaruskaj delehacyi na čale ź dziaržaŭnym sakratarom Rady biaśpieki Viktaram Šejmanam.
El Pais dadała, što ŭ kamputarnych pasłańniach uzhadvalisia inšyja mahčymyja krynicy pastavak zbroi (u pryvatnaści, rakietaŭ ziamla-pavietra) dla FARC.
El Pais — heta levacentrysckaje vydańnie, samaje ŭpłyvovaje ŭ Hišpanii. U śniežni hazeta pisała, što Venesueła zrabiłasia prytułkam dla FARC i što paŭstanckija lahiery źmiaščajucca na jaje terytoryi. Venesueła admaŭlaje heta.
The Wall Street Journal paviedamiŭ u piatnicu, što aficyjnyja asoby ŭ vyviedcy ZŠA peŭnyja ŭ sapraŭdnaści zdabytych kamputarnych fajłaŭ, jakija pakazvajuć ciesnyja poviazi pamiž Čavesam i kalumbijskimi paŭstancami.
U fajłach apisvajucca sustrečy pamiž paŭstanckimi kamandzirami j vysokapastaŭlenymi asobami z Venesueły, u tym liku samim Čavesam, – paviedamlaje hazeta, u rasparadžeńnie jakoj trapili bolš za 100 dakumentaŭ z kamputara Rejesa.
FARK viadzie partyzanku ŭžo 40 hadoŭ. Napačatku za FARK stajała bajavoje kryło Kampartyi, ale z časam, kali stała vidavočna, što FARK skaciłasia da narkahandlu i bandytyzmu, kamunisty razarvali z FARK.
Prezydenty Venesueły i Ekvadoru, što pryjšli da ŭłady na chvali antyamerykanskaha papulizmu, zdaŭna nienavidziać prezydenta Kalumbii — viernaha sajuźnika ZŠA, jaki abapirajecca na dapamohu Vašynhtonu ŭ baraćbie suprać narkamafii i partyzanki.
Vajna ŭ Kalumbii spryjaje rostu cenaŭ na naftu ŭ śviecie.
Venesueła nastojvaje, što fajły, zdabytyja Kalumbijaj paśla taho, jak jana atakavała paŭstancki lahier u Ekvadory, falšyvyja.
«My nie pryznajom sapraŭdnaści anivodnaha z hetych dakumentaŭ, – zajaviŭ u interviju The Wall Street Journal venesuelski pasoł u Złučanych Štatach Bernarda Alvares. — Jany falšyvyja, i źjaŭlajucca sprobaj dyskredytavać venesuelski ŭrad».
Viktar Šejman nieadnakroć naviedvaŭ Venesueły letaś. Aficyjna, jon adkazvaje za supolnyja biełaruska-venesuelskija prajekty ŭ naftazdabyčy i budaŭnictvie. Adkrytaje biełaruska-venesuelskaje vajskova-techničnaje supracoŭnictva maje abmiežavany charaktar.
Dziaržaŭny sakrataryjat biaśpieki nazvaŭ publikacyju ŭ «El Pais» «domysłami», paviedamlaje BiełaPAN. Pradstaŭniki Rady biaśpieki spasłalisia na papiaredžańni Čavesa, jaki kazaŭ, što Złučanyja Štaty arhanizujuć ukidańnie ŭ ŚMI takoha kampramatu, kab dyskredytavać kiraŭnictva Venesueły.
Kamientary