Niahledziačy na pryniatyja rašeńni ab pavyšeńni piensijnaha ŭzrostu, u budučyni ŭ piensijnym fondzie Biełarusi moža ŭtvarycca deficyt, zajaviŭ kiraŭnik misii Mižnarodnaha valutnaha fondu ŭ krainie Piter Dołman.
Vystupajučy 20 červienia z publičnaj lekcyjaj u halerei partała tut.by, Dołman kanstatavaŭ, što biełaruskaja ekanomika znachodzicca ŭ recesii, na krainu pastajanna ŭpłyvajuć «niespryjalnyja źniešnija šoki», i kab pieraadoleć ciažkija časy, MVF rekamienduje pravieści šerah reformaŭ. «My zaklikajem pravieści hłybokija reformy dla stabilizacyi ekanomiki i zabieśpiačeńnia ekanamičnaha rostu i rostu dabrabytu ŭ siarednieterminovaj pierśpiektyvie», — skazaŭ Dołman.
Piersanał fondu naziraje siońnia bolš vysokuju hatoŭnaść biełaruskich uładaŭ pravodzić reformy, čym raniej, adznačyŭ jon. «My bačyli skaračeńnie tempaŭ rostu zarpłat, abmiežavańnie abjomaŭ dyrektyŭnaha kredytavańnia, niahledziačy na vybary. My nazirali taksama skaračeńnie maštabaŭ cenavaha rehulavańnia, i heta stanoŭčyja kroki, ale my ličym, što nieabchodna pravodzić bolš maštabnyja reformy», — zajaviŭ Dołman.
U jakaści prykładu jon pryvioŭ situacyju ŭ piensijnaj śfiery. Pavodle acenak MVF, jakija pakazaŭ na hrafiku Dołman, da 2050 hoda deficyt piensijnaha fondu moh by dasiahnuć 7% VUP, adnak u vyniku abvieščanaha ŭ Biełarusi pavyšeńnia piensijnaha ŭzrostu jon moža skłaści 5% VUP.
«Deficyt daviadziecca kampiensavać albo za košt skaračeńnia piensijnych vypłat, albo za košt biudžetnych subsidyj», — skazaŭ pradstaŭnik MVF.
Pry hetym jon adznačyŭ, što pryniatyja biełaruskimi ŭładami rašeńni ab pavyšeńni piensijnaha ŭzrostu «zmohuć zabiaśpiečyć raŭnavažki stan piensijnaha fondu da 2022 hoda». «Zhodna z našymi acenkami i raźlikami, dziakujučy pryniatym rašeńniam ŭ piensijnaj śfiery piensijny fond u najbližejšyja piać-šeść hadoŭ budzie zastavacca zbałansavanym, adnak zatym z pryčyny admoŭnaj demahrafičnaj dynamiki deficyt usio ž taki budzie narastać», — zajaviŭ Dołman.
Kamientary