Entuzijasty z tvorčaha abjadnańnia «Dziŭnoty j pamaroctvy» nie spyniajucca ni pierad čym na svaim šlachu da vydańnia lehalnych filmaŭ na DVD pa-biełarusku.
Choć šlach akazvajecca nia blizki: kali biełaruskija dystrybutary nie dali rady, pradstaŭnik abjadnańnia adpraviŭsia na pieramovy ŭ Maskvu.
Tvorčaje abjadnańnie «Dziŭnoty j pamaroctvy» vyłučajecca siarod inšych padobnych inicyjatyŭ upartym imknieńniem vydavać nia prosta filmy pa-biełarusku, ale vydavać lehalna, z datrymańniem usich aŭtarskich pravoŭ.
Zrabić heta akazvajecca niaprosta.
Bujnyja karparacyi, kštałtu Walt Disney, DreamWorks, Warner Brothers i h. d. majuć svaich dystrybutaraŭ badaj u kožnaj krainie śvietu. Adnak u Biełarusi hetyja dystrybutary nie zajmajucca nijakimi inšymi pytańniami, aprača ŭłasna raspaŭsiudu hatovych dyskaŭ. To bok, pytańni ahučvańnia j dublavańnia videaprahramaŭ, a taksama majstravańnia kančatkovych DVD paprostu nie ŭvachodziać u ichniuju kampetencyju.
Źviarnuŭšysia da kampanii «VideaMaks» (aficyjna pradstaŭlaje na Biełarusi Walt Disney i Universal) z prapanovaju absalutna biaspłatna stvarać dla ich biełaruskija hukavyja darožki da filmaŭ, raspaŭsiudam jakich na Biełaruś jany zajmajucca, entuzijasty atrymali adkaz, što na biahučy momant kampanija «VideaMaks» jurydyčna nia maje dazvołu ad Walt Disneyja choć niejkim čynam vidaźmianiać hatovuju pradukcyju, jakuju jana atrymlivaje dla realizacyi ŭ našaj krainie.
Takim čynam, kab u kramach licenzijna pradavalisia dyski, na jakich aprača aryhinalnaje j rasiejskaje hukavaje darožki była b jašče j biełaruskaja, patrebny albo zakon, jak va Ŭkrainie, dzie da raspaŭsiudu nie dapuskajucca videaprahramy, na jakich niama dziaržaŭnaje movy, albo dobraachvotny pierahlad kantraktaŭ tutejšych dystrybutarskich kampanijaŭ z aficyjnymi pravaŭładalnikami, što ŭ dadzienaj sytuacyi padajecca amal niemahčymym.
Tamu «Dziŭnoty j pamaroctvy» vyrašyli źviarnucca naŭprost u pradstaŭnictva Walt Disneyja pa SND, jakoje znachodzicca ŭ Maskvie, z tym, kab patłumačyć moŭnuju sytuacyju ŭ našaj krainie j pasprabavać pierakanać ich u nieabchodnaści dublavańnia zamiežnych filmaŭ, najpierš multyplikacyjnych, na nacyjanalnuju movu.
U jakaści prykładu taho, što ŭ Biełarusi ahučvańnie videaprahramaŭ možna vykonvać na vysokim jakasnym roŭni (navat pry ŭmovie, što sprava robicca na roŭni hramadzkaje inicyjatyvy pry praktyčna nulavym biudžecie), u Maskvu adpravili kolki dyskaŭ z ahučanym «Tarzanam». Aktyvisty ź «Dziŭnotaŭ…» stavać sabie metu damahčysia ŭklučeńnia biełaruskamoŭnych hukavych darožak (hetaksama, jak i biełaruskich patokaŭ subtytułaŭ) u tyja DVD-dyski, što realizujucca ŭ Biełarusi praz aficyjnyja sietki raspaŭsiudu.
A tym časam vypuščany na zavodzkich kružełkach abmiežavany nakład dublavanaha pa-biełarusku «Tarzana» užo trapiŭ da raspaŭsiudnikaŭ, — paviedamlajuć «Dziŭnoty j pamaroctvy».
X
Kamientary