Były prezident Jehipta Chośni Mubarak adpraviŭsia dadomu paśla šaści hadoŭ źniavoleńnia, paviedamiŭ jaho advakat. Apošnija piać hadoŭ zrynuty prezident znachodziŭsia ŭ vajskovym špitali ŭ Kairy z-za prablem sa zdaroŭjem, u sud jaho dastaŭlali na viertalocie, paviedamlaje VVS.
Pa słovach jaho advakata, ciapier eks-prezident źjechaŭ z špitala i adpraviŭsia dadomu, u Hielijapolis.
2 sakavika Vyšejšy apielacyjny sud u Jehipcie apraŭdaŭ Mubaraka pa spravie ab zabojstvie demanstrantaŭ u 2011 hodzie, kali pratestnyja akcyi pryviali da adstaŭki ŭrada i prezidenta, niahledziačy na masavyja aryšty i ŭvod vojskaŭ u harady. Pavodle danych AAN, u vyniku sutyknieńnia siłavikoŭ i pratestoŭcaŭ zahinuła kala 300 čałaviek.
Chośni Mubarak u 2012 hodzie atrymaŭ pažyćciovy termin, bo sud pryznaŭ jaho adkaznym za rasstreł mirnych demanstrantaŭ vajskoŭcami. Adnak były prezident abskardziŭ prysud, i ŭ 2014 hodzie rašeńnie było admienienaje. U adkaz užo prakuratura padała ŭ vyšejšy sud skarhu, ale sud adchiliŭ jaje, i rašeńnie ab apraŭdańni Mubaraka ŭstupiła ŭ siłu.
Mubaraku 88 hadoŭ, jon zajmaŭ pasadu prezidenta Jehipta z 1981 pa 2011 hady. Jon vymušany byŭ syści ŭ adstaŭku na fonie masavych akcyj pratestu ŭ krainie, jakija pačalisia zimoj 2011 hoda. Pratestoŭcy patrabavali adstaŭki prezidenta i ekanamičnych reformaŭ u krainie.
Paśla adstaŭki Mubaraka i ŭrada da ŭłady pryjšoŭ časovy ŭrad. U 2012 hodzie prajšli prezidenckija vybary, na jakich pieramoh kandydat ad «Bratoŭ-musulman» Machamied Mursi.
Kamientary