Bił Hiejts raspavioŭ pra zabaronu na smartfony dla svaich dziaciej
Zasnavalnik kampanii Microsoft i samy bahaty čałaviek na płaniecie Bił Hiejts nie dazvalaŭ dzieciam karystacca smartfonami, pakul im nie spoŭniłasia 14 hadoŭ. Pra heta jon raspavioŭ u intervju brytanskamu vydańniu Mirror, piša Tut.by.
U Hiejtsa troje dziaciej: 20-hadovaja Dženifier, 17-hadovy Rory i 14-hadovaja Fibi. Usich ich zakranuli abmiežavańni na vykarystańnie hadžetaŭ. «My časta vyznačajem čas, paśla jakoha nielha karystacca hadžetami. U ich vypadku heta dapamahaje zasnuć u razumny čas», — raspavioŭ kiraŭnik Microsoft.
Hiejts patłumačyŭ, što imkniecca zrabić tak, kab dzieci vykarystoŭvali smartfony dla karysnych zaniatkaŭ — naprykład, vykanańnia chatnich zadańniaŭ abo znosin ź siabrami. Ale časam hadžetaŭ stanovicca zanadta šmat.
«My nie karystajemsia mabilnymi telefonami, kali jamo za stałom, — raspavioŭ jon. — My nie davali smartfony našym dzieciam, pakul im nie spoŭniłasia 14 hadoŭ. Jany skardzilisia, što inšyja dzieci atrymlivali ich raniej».
Hiejts nie ŭdakładniŭ, smartfonami jakoj marki karystajucca členy jaho siamji. U 2012 hodzie jaho žonka Mielinda u intervju raspaviała, što dzieciam Hiejtsa zabaroniena karystacca praduktami Apple: «Bahaćcie našaj siamji pryjšło ad Microsoft, dyk navošta nam addavać hrošy kankurentu?»
Paźniej sam Bił Hiejts udakładniŭ jaje słovy, skazaŭšy, što ich dzieci i nie prosiać pradukty Apple. «Jany ščaślivyja sa svaimi Windows Phone», — skazaŭ tady kiraŭnik Microsoft.
Kamientary