Baćki zahinułaj na bulbie dziaŭčynki prosiać nie pazbaŭlać svabody i pracy nastaŭnikaŭ
Sprečki i prysud pa spravie ab hibieli na bulbie 13-hadovaj Viki Papčeni projduć u sudzie Maładziečanskaha rajona biez udziełu baćkoŭ Viktoryi. Julija i Aleh Papčenia ŭ niadzielu, 9 lipienia, źjazdžajuć ź Biełarusi i płanujuć viarnucca nie raniej za 21 lipienia, piša kraj.by.
Julija Papčenia 7 lipienia raspaviała Kraj.baj:
— My ciažka pieranosim hety sudovy praces, jaki doŭžycca ŭžo vielmi doŭha. Nam treba źjechać, źmianić stanovišča. Dy i paśla vyniasieńnia prysudu znoŭ pačnucca zvanki roznych ludziej, u tym liku žurnalistaŭ. Ad takoj uvahi my stamilisia i nie žadajem nijakich kantaktaŭ. U sud napisali zajavu, u jakoj chadajničajem skončyć sudovy praces biez nas. Skažu taksama: my nie chočam, kab abvinavačanych nastaŭnikaŭ pazbaŭlali svabody i mahčymaści vykładać.
Tak, jany vinavatyja, ale jość ludzi, čyja vina bolš značnyja. Nie budu nazyvać proźviščy. Hetyja ludzi čamuści nie znachodziacca na łavie padsudnych.
***
Sudovy praces pa abvinavačvańni nastaŭnikaŭ Iryny Apanasievič i Volhi Zavadskaj u nienaležnym vykanańni abaviazkaŭ pa harantavańni biaśpieki žyćcia i zdaroŭja dziaciej, što paciahnuła pa nieaściarožnaści śmierć vaśmikłaśnicy Viki Papčeni, pradoŭžyŭsia 7 lipienia.
U pieršaj častcy pasiadžeńnia sudździa Pavieł Žačko daśledavaŭ siem tamoŭ piśmovych materyjałaŭ kryminalnaj spravy.
Paśla hetaha advakaty abvinavačanych pieradali sudu chadajnictva ad pracoŭnaha kalektyvu SŠ №11 i baćkoŭskaha kamiteta ab źmiakčeńni pakarańnia nastaŭnicy fiziki Irynie Apanasievič i nastaŭnicy francuzskaj movy Volzie Zavadskaj. Nastaŭniki i baćki prosiać sud nie pazbaŭlać voli Irynu i Volhu, a taksama dazvolić im pracavać na svaich miescach. Sa zhody ŭsich udzielnikaŭ pracesu chadajnictvy byli dałučany da materyjałaŭ kryminalnaj spravy.
Kamientary