Chłopcu, jaki adbivaŭ demanstrantaŭ u ahientaŭ u cyvilnym, pahražaje da 6 hadoŭ
«Marš niedarmajedaŭ», jaki prajšoŭ u Minsku 15 sakavika minułaha hoda, skončyŭsia masavaj bojkaj kala tralejbusa na płoščy Banhałor. Siłaviki ŭ cyvilnym pasprabavali zatrymać tam hrupu anarchistaŭ, jakija chavali svaje tvary. Ciapier adnamu ź minakoŭ, jakija dapamahli adbivać anarchistaŭ z ruk siłavikoŭ, pahražaje da 6 hod źniavoleńnia, paviedamlaje Jeŭraradyjo.
Pratestoŭcy tady — dziakujučy dapamozie nieabyjakavych minakoŭ — zmahli adbicca i źjechali ŭ tralejbusie. Mnohich ź ich ŭsio-taki zatrymali praź niekalki prypynkaŭ, na skryžavańni vulicy Maksima Bahdanoviča i praśpiekta Mašerava.
Na nastupny dzień zatrymanych (akramia traich vypadkovych pasažyraŭ, jakija trapili ŭ milicyju razam z usimi astatnimi, ale paźniej byli adpuščanyja) sudzili i pakarali sutkami administracyjnaha aryštu.
Na fota bačna mužčynu ŭ čyrvonaj kurtcy, jaki dapamahaje anarchistam. Praź niekalki dzion milicyja vyličyła i zatrymała jaho. Zatrymanaha minčuka kličuć Śviatasłaŭ B. Jon naradziŭsia 18 krasavika 1986 hoda ŭ Vilejskim rajonie (Minskaja vobłaść), pa prafiesii — budaŭnik.
Šeść hadoŭ tamu Śviatasłaŭ B. ŭžo fihuravaŭ u kryminalnaj chronicy pa rezanansnaj spravie: jaho sudzili za ŭdzieł u biesparadkach na płoščy Niezaležnaści paśla prezidenckich vybaraŭ 19 śniežnia 2010 hoda. Chłopca zatrymali adnym z apošnich, 15 červienia 2011 hoda. Kryminalnaja sprava tady ŭžo była faktyčna zakrytaja, pa joj adbylisia dziasiatki sudoŭ.
12 kastryčnika 2011 hoda sudździa Maskoŭskaha rajona Minska Alena Rudnickaja pakarała Śviatasłava B. tryma hadami abmiežavańnia voli biez nakiravańnia va ŭstanovu adkrytaha typu. Sud prymianiŭ u dačynieńni da jaho artykuł 70 KK i paličyŭ mahčymym vynieści prysud mienšy za minimalnuju miažu, praduhledžanuju za ŭdzieł u masavych biesparadkach.
Sudździa patłumačyła heta najaŭnaściu źmiakčajučych abstavin — maładoha ŭzrostu (chłopcu było ŭsiaho 25 hadoŭ) i najaŭnaści ŭ jaho miesca pracy. Ciapier ža jamu pahražaje značna daŭžejšy termin źniavoleńnia:
«Pravierki pa ŭkazanych faktach pravodzilisia ŭpraŭleńniem Śledčaha kamiteta pa horadu Minsku. Była raspačataja kryminalnaja sprava pa 339 artykule Kryminalnaha kodeksa «Chulihanstva». Padčas rasśledavańnia abstavin zdareńnia było vyjaŭlena, što abvinavačany, žychar Minska, užyŭ hvałt u dačynieńni da mužčyny na prypynku hramadskaha transpartu, viedajučy pra toje, što toj źjaŭlajecca supracoŭnikam orhanaŭ unutranych spraŭ. Heta było peŭna ŭstanoŭlena padčas rasśledavańnia spravy. Jana była pierakvalifikavanaja na artykuł 364. Rasśledavanaja sprava pieradadzienaja prakuroru dla nakiravańnia ŭ sud», — paviedamiŭ Jeŭraradyjo aficyjny pradstaŭnik Śledčaha kamiteta Siarhiej Kabakovič.
Maksimalnaje pakarańnie pa artykule 364 KK «Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ» — pazbaŭleńnie voli na termin da šaści hadoŭ.
Kamientary