Kanflikt AMAP i kampanii maładzionaŭ u Novy hod: viersija paciarpiełaj, śviedki, SK
Aktorka Śviatłana Sakałoŭskaja śćviardžaje, što ŭ navahodniuju noč supracoŭnik minskaha AMAP ni za što, ni pra što spačatku ŭdaryŭ jaje pa ruce dźviaryma słužbovaha aŭtobusa, a paśla — dubinkaj pa hałavie. Dziaŭčyna chacieła adśviatkavać Novy hod la śviatočnaj jołki pobač z «Čyžoŭka-Arenaj», a ŭ vyniku trapiła ŭ Balnicu chutkaj miedyčnaj dapamohi sa strasieńniem mazhoŭ.
U Śledčaha kamiteta — svaja viersija taho, što adbyłosia. Aficyjnaja pradstaŭnica SK Julija Hančarova u razmovie ź Jeŭraradyjo ŭstrymlivajecca ad kamientaryjaŭ, padkreślivajučy, što vypadak składany i nieadnaznačny. Śpikierka Śledčaha kamiteta kaža, što siabroŭki Śviatłany byli napadpitku, — za heta ich zatrymali ŭ navahodniuju noč i paźniej i pakarali štrafami.
U adnym ź niefarmalnych kamientaryjaŭ u «Fejsbuku» Hančarova zaŭvažaje, što «aktorka žyvaja i zdarovaja, i dubinkaj jaje nichto nie biŭ», i abiacaje razabracca ŭ situacyi:
«Kancert zakančvajecca praź piać chvilin, vam tam niama čaho rabić»
Śviatłana Sakałoŭskaja (heta sceničny psieŭdanim dziaŭčyny, svajo sapraŭdnaje proźvišča jana nazyvać nie choča) sustrakała 2018 hod u maminaj kvatery ŭ Čyžoŭcy, a paśla pajšła pahulać sa svaim chłopcam Alaksandram i tryma siabroŭkami. Šlach da jołki, što stajała pierad «Čyžoŭka-Arenaj», zaniaŭ kala hadziny. Navokał vybuchali saluty, usim było viesieła i ništo nie abiacała biady.
Placoŭka dla śviatkavańnia była abniesienaja milicejkim kardonam. Pa słovach Śviatłany, maładyja ludzi vyrašyli pačakać, pakul ludziej za aharodžaj stanie mienš, a paśla prajści ŭ śviatočnuju zonu. Adna ź siabrovak tym časam pajechała dadomu.
Prykładna ŭ 3:55 astatnija padzialilisia na pary i z roznych bakoŭ pasprabavali patrapić da jołki. U Alaksandra i adnoj ź siabrovak Śviatłany heta atrymałasia. U samoj aktrysy i jašče adnoj jaje siabroŭki — nie: na ŭvachodzie ich spyniŭ supracoŭnik AMAP.
«Na vyhlad jon byŭ vielmi małady. Mahčyma, jon navat pieršy raz na takuju spravu vyjšaŭ, i adčuvaŭ, što vykonvaje niejkaje važnaje pryznačeńnie. Jon tłumačyŭ nam: «Kancert zakančvajecca praź piać chvilin, vam tam niama čaho rabić»», — raspaviadaje Jeŭraradyjo Śviatłana Sakałoŭskaja.
U Śviatłany ŭziali analiz kryvi na ałkahol. Vynik admoŭny
Čamu maładyja ludzi vyrašyli padychodzić da jołki z roznych bakoŭ? «Prosta tak padzialilisia», — tłumačyć Jeŭraradyjo Alaksandr. Pa jaho słovach, ałkaholu ŭ kampanii z saboj nie było.
Paźniej, kali Śviatłana Sakałoŭskaja ŭžo znachodziłasia ŭ lakarni, u jaje ŭziali analiz na ŭtrymańnie ałkaholu ŭ kryvi. U zaklučeńni, jakoje daŭ doktar, ni słova pra ałkahol niama:
Ale, jak stała viadoma Jeŭraradyjo ź nieaficyjnych krynicaŭ, u SK ličać, što kanflikt pamiž AMAPaŭcam i maładymi ludźmi ŭźnik mienavita praz ałkahol, jaki jany sprabavali pranieści ŭ śviatočnuju zonu. Mahčyma, trapić da jołki z ałkaholem nie atrymałasia raniej, kali kampanija tolki pryjšła da «Čyžoŭka-Areny». Milicyjanty zapomnili dziaŭčyn i nie prapuścili ich, kali jany pasprabavali prajści na śviata ŭ druhi raz.
«Vy nie ŭjaŭlajecie sabie, jak baluča, kali až da miasa łamajecca paznohać»
Tak ci inakš, u peŭny momant AMAPaŭcu nadakučyła spračacca ź dziaŭčynami, i jon pavioŭ siabroŭku Śviatłany da słužbovaha aŭtobusa. Tudy ž na šum pryjšli Alaksandr i dziaŭčyna, jakaja była ź im. Śviatłana pasprabavała abaranić siabroŭku i instynktyŭna zazirnuła ŭ bus.
«Ja prosta zazirnuła tudy — dzie jana tam i što. Nu, razumiejecie, pa inercyi. I instynktyŭna vyciahnuła ruku napierad, — raspaviadaje Śviatłana. — Kali AMAPaviec heta ŭbačyŭ, jon ad złości až zuby ścisnuŭ. I dźviaryma ŭziaŭ tak, i braznuŭ. Mahčyma, pierad maim nosam chacieŭ ich začynić, ale ŭ mianie ruka była napieradzie, i jon trapiŭ pa joj. Vy nie ŭjaŭlajecie sabie, jak baluča, kali až da miasa łamajecca paznohać. Heta tak baluča… Ja ad boli dumała, što ŭ mianie ŭžo ruki niama».
Dalej padziei razhortvalisia jak u drennym bajeviku. Chłopiec Śviatłany źviarnuŭsia da čałavieka, jakoha jon paličyŭ načalnikam prysutnych na miescy AMAPaŭcaŭ, i spytaŭ proźvišča kryŭdziciela svajoj dziaŭčyny. Zamiest adkazu Alaksandra taksama zatrymali. Śviatłana pabiehła da dźviarej aŭtobusa, jaki ŭžo źjazdžaŭ. I tut adčuła mocny ŭdar pa hałavie zzadu. Jak miarkuje dziaŭčyna, niechta (mahčyma, toj ža samy AMAPaviec, jaki zatrymlivaŭ jaje siabroŭku) udaryŭ jaje dubinkaj.
Chto heta byŭ, dakładna nie viedaje ni Śviatłana, ni Alaksandr, jaki ŭ toj čas siadzieŭ u aŭtobusie. Chłopca vypuścili z aŭtobusa, kab jon zavioz jaje ŭ balnicu. U dziaŭčyny dyjahnastavali strasieńnie mazhoŭ.
Nijakaj spravy suprać aktorki raspačata nie było
Z balnicy maładyja ludzi vyjšli tolki a 7-j ranicy — navahodniaja noč była niezvarotna sapsavanaja. Śviatłana źniała paboi i źviarnułasia z zajavaj u milicyju. Śledčy kamitet pačaŭ pravierku.
Pa słovach aktorki, dźviuch siabrovak, jakija byli ź joj u navahodniuju noč, usio ž zatrymali. Da 3 studzienia jany prasiadzieli ŭ milicejskim izalatary ŭ čakańni suda. U vyniku ich pakarali štrafami za administracyjnaje pravaparušeńnie.
Ale, nakolki Śviatłana viedaje, nijakaj spravy suprać jaje samoj raspačata nie było. Atrymlivajecca, jana ŭ lubym vypadku ni ŭ čym nie vinavataja, ale paciarpieła bolš za ŭsich.
Nie było ŭ pravaachoŭnikaŭ pretenzijaŭ i da Alaksandra, jaki — nahadajem — navat paśpieŭ pasiadzieć u milicejskim aŭtobusie. Chłopiec kaža, što za miesiac, jaki idzie pravierka, śledčyja nie paturbavali jaho nivodnaha razu, chacia jon na svaje vočy bačyŭ amal usio, što adbyvałasia.
Vypadkam zajmajecca ŭžo čaćviorty śledčy
Vyniki pravierki, jakuju pravodzić Śledčy kamitet, musili być hatovyja 1 lutaha. Ale Sakałoŭskaja paviedamiła Jeŭraradyjo, što raźbiralnictva praciahnutaje jašče na 2 miesiacy.
«Telefanavała siońnia ŭ kamitet. Fiedarenka [staršaja śledčaja SK. — Jeŭraradyjo] mnie paviedamiła, što termin razhladu spravy praciahnuty na dva miesiacy», — raspaviała Jeŭraradyjo Sakałoŭskaja.
Pa słovach dziaŭčyny, jaje vypadkam zajmajecca ŭžo čaćviorty śledčy. Proźvišča pieršaha — Askieraŭ, druhoha — Nieściarovič, a jak zavuć treciaha, joj nie skazali. Adzin raz raźbiralnictva ŭžo było praciahnutaje. Paviedamlajučy pra heta, užo čaćviortaja śledčaja pamyliłasia ŭ dacie:
Kapitan justycyi A.A. Fiedarenka, jakaja zaraz zajmajecca pravierkaj, nie stała kamientavać raźbiralnictva i parekamiendavała Jeŭraradyjo źviarnucca ŭ pres-słužbu Śledčaha kamiteta. Tam ad razhornutych kamientaryjaŭ pakul što ŭstrymlivajucca, padkreślivajučy, što vypadak składany i nieadnaznačny.
«Dadzienaja situacyja znachodzicca na asabistym kantroli ŭ načalnika HUUS Minharvykankama, vyśviatlajucca ŭsie abstaviny zdareńnia. Pa vynikach pravierki dziejańniam supracoŭnikaŭ AMAP HUUS Minharvykankama budzie dadziena pryncypovaja acenka», — adznačajecca ŭ paviedamleńni na sajcie minskaj milicyi.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary