«Adzin pracuje jak ceły litaraturny instytut!» Siarhiej Šapran adznačaje 50-hodździe
Siarhieju Šapranu — 50! Kali ja dumaju pra toje, kolki ŭžo paśpieŭ zrabić Siarhiej Šapran, to adčuvańnie, što siońnia jamu spaŭniajecca nie 50, a jak minimum 100 hadoŭ. A kali razmaŭlaju ź im, to ŭražańnie, što pierada mnoju — raŭnaletak. Kali dumaju pra toje, kolki jašče jon moža zrabić, dyk chočacca, kab Boh admieryŭ jamu jašče jak minimum dvojčy pa stolki.
Adzin pracuje jak ceły litaraturny instytut. Nichto nie zrabiŭ bolš za jaho dla ŭšanavańnia pamiaci Vasila Bykava, Hienadzia Buraŭkina, Ryhora Baradulina. Jon byŭ dobrym siabram dla našych kłasikaŭ pry žyćci, jon zastajecca ŭdziačnym unukam paśla ich sychodu. Razumny, adukavany, intelihientny, ujedlivy — i ŭsie hetyja rysy Siarhieju ŭdajecca skiravać u stvaralnaje rečyšča biełaruskaj kultury. Jašče adna rysa— fienamienalnaja ścipłaść. Kali huhliš «Siarhiej Šapran», to najpierš bačyš dziasiatki materyjałaŭ nie pra jaho, a jahony ščyry darobak na nivie Biełaruščyny, jahonaje ŭsłaŭleńnie vołataŭ našaj kultury! Nie viedaju, chto b jašče zdoleŭ stolki hod prasiedzieć nad archivami našych tvorcaŭ, kab uvasobić heta ŭ dobry tuzin knih, bolšaść ź jakich užo raźmiali ŭ kniharniach i kramach. Kolki ludziej stali biełarusami dziakujučy hetym kniham? Nazavu zaraz tolki adno imia — Pavieł Bierahovič. Naradziŭsia u Rasiei, choć z pachodžańnia biełarus. I dziakujučy pierapiscy Bykava z Baradulinym, jakuju padrychtavaŭ Šapran, viarnuŭsia da karanioŭ, uśviadomiŭ siabie biełarusam. I siońnia Pavieł — hałoŭny miecenat biełaruskaj kultury!
Siarhiej naradziŭsia ŭ Ryzie, sam pachodzić z-pad Siebieža. Siońnia heta terytoryja susiedniaj dziaržavy, ale pierada mnoj lažyć mapa Biełaruskaj Narodnaj Respubliki, dzie hetaja miaścina jakraz traplaje na terytoryju BNR! Zvažajučy na miesca naradžeńnia, Ryhor Baradulin niekali padpisaŭ Siarhieju knihu «Samamu biełaruskamu niebiełarusu…» Dazvolu siońnia papravić kłasika i pažadać samamu biełaruskamu biełarusu zdaroŭja, plonu, radaści i natchnieńnia!
Kamientary