Top-25 najvybitniejšych biznesmienaŭ sučasnaj Biełarusi (1992—2017 hh.) — heta sumiesny prajekt «Ježiednievnika» (EJ.BY) i «Ideja Banka», pryśviečany historyi pradprymalnictva ŭ Respublicy Biełaruś.
U top-25 uvajšli najbolš jarkija pradstaŭniki biełaruskaha biznesu ŭ 1992—2017 hadach. Udzielniki rejtynhu stajali la vytokaŭ farmiravańnia novych zavodaŭ, novych halin i novaj ekanomiki sučasnaj Biełarusi. Biznes-prajekty mnohich ź ich uvachodziać u lik nacyjanalnych, rehijanalnych abo suśvietnych lidaraŭ. Ich kampanii źjaŭlajucca najbujniejšymi ŭ krainie padatkapłacielščykami i pracadaŭcami i bolšaść ź ich na najbližejšyja hady stanuć hałoŭnaj ruchalnaj siłaj kankurentazdolnaha raźvićcia nacyjanalnaj ekanomiki.
Unikalnaść prajekta ŭ tym, što samych zaŭvažnych fihur u svaim asiarodździ nazyvali sami biznesmieny. U składańni rejtynhu taksama ŭziali ŭdzieł uładalniki b2b-kampanij, pradstaŭniki pradprymalnickich hramadskich ruchaŭ i žurnalisty dziełavych ŚMI.
1. Alaksandr Mašenski
47 hadoŭ (1970)
«Santa Impeks Brest», «Santa Bremar», «Savuškaŭ pradukt», «Ruskaje mora»
U 1992 hodzie vypusknik miechmata BDU zamiest aśpirantury abraŭ pracu ŭ siamiejnaj rybahandlovaj firmie «Niła» i prajšoŭ razam z baćkam Michasiom Mašenskim uvieś šlach pieratvareńnia nievialikaj kampanii ŭ adnaho ź lidaraŭ charčovaha rynku byłoha SSSR.
U 2000 hodzie Alaksandr Mašenski staŭ na čale biznesu, zapuściŭ u ekspłuatacyju zavod «Santa Bremar» u Breście. U 2012 hodzie biznesmien nabyŭ bujnuju rybapierapracoŭčuju vytvorčaść u Rasii — kampaniju «Ruskaje mora». Z 2006 hoda, u jakim jon staŭ uładalnikam kantrolnaha pakieta «Savuškavaha pradukta», Alaksandr Mašenski paśpiachova inviestuje ŭ małočnuju halinu.
Biznesmien źjaŭlajecca hanarovym konsułam Isłandyi ŭ Respublicy Biełaruś, členam Rady pa raźvićci pradprymalnictva i ŭznačalvaje nacyjanalnuju fiederacyju viesłavańnia i Biełaruski sajuz viaślarnych vidaŭ sportu.
2. Arkadź Dobkin
Fota: epam-group.ru
57 hadoŭ (1960)
EPAM Systems
Inžynier elektratechniki Arkadź Dobkin stajaŭ la vytokaŭ kaapieratarskaha ruchu ŭ Biełarusi. U 1987 hodzie, syšoŭšy ź Instytuta paraškovaj mietałurhii, jon zasnavaŭ kaapieratyŭ pa vytvorčaści softu.
U 1991 hodzie Arkadź Dobkin emihravaŭ u ZŠA, a ŭ 1993 hodzie stvaryŭ EPAM Systems. Adpraŭnym punktam da jaje pieratvareńnia ŭ adnaho z suśvietnych lidaraŭ pa raspracoŭcy PA staŭ kantrakt dla SAP.
U 2006 hodzie EPAM Systems atrymała źniešniaje inviestavańnie ad amierykanskaj kampanii Siguler Guff & Company. U 2012 hodzie Arkadź Dobkin i jaho partniory vyvieli EPAM Systems na Ńju-Jorkskuju fondavuju biržu, nad budynkam jakoj upieršyniu ŭ jaje 220-hadovaj historyi ŭźniaŭsia ściah niezaležnaj Biełarusi.
Arkadź Dobkin stajaŭ la vytokaŭ stvareńnia PVT, jaho kampanija źjaŭlajecca adnym z najbujniejšych rabotadaŭcaŭ ŭ IT-halinach Biełarusi, Ukrainy i Rasii.
3. Aleh Chusajenaŭ
Fota: probusiness.io
53 hady (1964)
«Zubr Kapitał», «Atłant-M»
Pačaŭšy zarablać na myjcy voknaŭ u 1990 hodzie, avijacyjny inžynier razam sa svaim susiedam pa pakoi ŭ internacie Maskoŭskaha instytuta inžynieraŭ hramadzianskaj avijacyi i jašče niekalkimi partniorami stvaryŭ adnu z najbujniejšych aŭtadylerskich kampanij na rynkach Biełarusi, Rasii i Ukrainy.
Pieršym i najvažniejšym partnioram chołdynhu «Atłant-M» staŭ u 1994 hodzie Volkswagen Group. U dvuchtysiačnych hadach praź niekalki dziasiatkaŭ aŭtasałonaŭ chołdynhu pradavałasia bolš za 20 aŭtamabilnych brendaŭ. Taksama ŭładalniki «Atłant-M» ukłali srodki ŭ MTBank, farmaceŭtyku, IT i inšyja haliny.
U 2010 hodzie Aleh Chusajenaŭ pakinuŭ aŭtamabilny biznes i zaniaŭsia inviestycyjnaj dziejnaściu. Pad kiravańniem kampanii «Zubr Kapitał», jakuju jon uznačalvaje znachodziacca pieršyja ŭ Biełarusi fondy pramych inviestycyj — SMH i Zubr Capital Fund I.
4. Viktar Kisły
Fota: mcvuk.com
41 hod (1976)
Wargaming
Biznesam vypusknik fizfaka BDU pačaŭ zajmacca ŭ 1998 hodzie, kali z hrupaj entuzijastaŭ stvaryŭ kampaniju Wargaming i prystupiŭ da raspracoŭki pieršaj anłajn-hulni. Dla taho, kab da jaho pryjšła viadomaść i vialikija hrošy, spatrebiłasia bolš za dziesiać hadoŭ.
U kancy 2010 i pačatku 2011 hadoŭ kampanija Wargaming prezientavała na niekalki movach šmatkarystalnickuju hulniu World of Tanks. Anłajn-ekšen, jaki staŭ kultavym, prynios Viktaru Kisłamu pieršy miljon dalaraŭ, a ŭ lutym 2016 hoda ahienctva Bloomberg uklučyła jaho ŭ śpis miljarderaŭ.
Biznesmien układvaje srodki ŭ studyi pa raspracoŭcy hulniaŭ i dystrybutarskija ofisy pa ŭsim śviecie, sfarmavaŭšy da ciapierašniaha času adzin z najbujniejšych hulniavych biznesaŭ. Taksama Viktaru Kisłamu naležać bank i nieruchomaść na Kipry, dzie jon pražyvaje.
5. Siarhiej Kaściučenka
Fota: zviazda.by
61 hod (1956)
«Pryjorbank»
Vypusknik Minskaha radyjotechničnaha instytuta i kursaŭ navukovaj ekanomiki Vupiertalskaha ŭniviersiteta ŭ 1990 hodzie ŭznačaliŭ Minski inavacyjny bank (budučy «Pryjorbank»), jakim niaspynna praciahvaje kiravać da siońniašniaha času.
Pry Siarhieju Kaściučenku ŭ 1997 hodzie «Pryjorbank» pryciahnuŭ u kapitał Jeŭrapiejski bank rekanstrukcyi i raźvićcia, a ŭ 2003 hodzie stratehičnaha inviestara — aŭstryjskuju bankaŭskuju hrupu Raiffeisen Bank International. Na praciahu 1990—2010-ch «Pryjorbank» uvachodzić u lik lidaraŭ bankaŭskaha rynku Biełarusi i źjaŭlajecca sistemaŭtvaralnym bankam haliny.
Bankir ličycca adnym z samych upłyvovych pradstaŭnikoŭ biełaruskaha biznesu, jon źjaŭlajecca hanarovym konsułam Aŭstryi ŭ Respublicy Biełaruś.
Padrabiazna paznajomicca z usimi ŭdzielnikami rejtynhu vy možacie pa spasyłcy, my padajom pieralik biznesoŭcaŭ i ich asnoŭnych aktyvaŭ:
6. Valancin Bajko (47 hadoŭ) — «Konte Spa», Brescki pančošny kambinat, Turaŭski małočny kambinat.
7. Juryj Čyž (54 hady) — «Trajpł», FK «Dynama-Minsk», ProStore, «Kvarcmiełpram», Biarozaŭski kambinat silikatnych vyrabaŭ, «Danprad», «Akvatrajpł», Minski zavod pienistych vin.
8. Alaksandr Pupiejka (63 hady) — «Puše», «Alimp».
9. Vital Arbuzaŭ (53 hady) — Fenox Automative Components, Fenox Venture Capital, «Prestan».
10. Alaksandr Cencier (51 hod) — «A-100»
11. Alaksiej Žukaŭ (50 hadoŭ) — «Alutech», Guenther Tore Systems.
12. Jaŭhien Baskin (52 hady) — «Siervaluks Ahra», «Smalavičy brojler», «Ekamoł», «Ahralink», «Junimit», «Biełatmit».
13. Viktar Prakapienia (34 hady) — VP Capital, Viaden Media.
14. Alaksandr Šakucin (58 hadoŭ) — «Amkador», «Salea», «Interservis», «PMV hrup», «Spamaš hrup», «Absalutbank», «Šanter», «Iskamied», Naftabitumny zavod, «Kupałaŭskaje».
15. Pavieł Tapuzidzis (61 hod) — «Tytuń-Inviest».
16. Siarhiej Litvin (51 hod) — «Jeŭrahandal», Minski zavod vinahradnych vin, «Statusbank».
17. Juryj Zisier (57 hadoŭ) — «Tut Baj Miedyja».
18. Michaił Mašenski (71 hod) — «Niła», «Santa Impeks Brest», «Santa Bremar».
19. Juryj Hurski (34 hady) — Haxus, Viaden Media.
20. Uładzimir Vasilka (51 hod) — «Jeŭrahandal», Minski zavod vinahradnych vin, «Statusbank».
21. Piotr Marcaŭ (1962—2014) — «Marat».
22. Jaŭhien Šyhałaŭ (1953—2014) — Handlovy dom «Ždanovičy».
23. Mikałaj Martynaŭ (61 hod) — «Marka», «Dźvinski Brovar».
24. Adam Paluchovič (60 hadoŭ) — «Dajnova».
25. Uładzimir Piefcijeŭ (60 hadoŭ) — «Biełtechekspart», «Biełtech Chołdynh», «Mabilnaja ličbavaja suviaź», «Dziełavaja sietka», «Sport-pary», «BT Telekamunikacyi»
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary