Pad Maładziečnam dastali z vady mužčynu, a vyratavać nie zmahli. Bo nichto nie viedaŭ, jak heta robicca
Na vadajomie ŭ vioscy Krynica, što pad Maładziečnam, 1 žniŭnia patanuŭ mužčyna.
Mužčyna, jakomu było kala 30 hadoŭ, adpačyvaŭ u kampanii. Jaho paśpieli vyciahnuć z vady, ale nie vyratavali.
Maładziečaniec Alaksandr, što apynuŭsia na tym vadajomie, raskazaŭ, što nichto nie viedaŭ, što rabić.
«My ź siabrami adpačyvali ź inšaha bieraha voziera, i ŭžo źjazdžali dadomu, kali raptam nam nasustrač vybiehła žančyna, jakaja zvała na dapamohu. Ź jaje słovaŭ my zrazumieli, što ŭ vadzie tonie mužčyna. Pakul my dabiehli da taho miesca, u vadu kinuŭsia taksist, jaki apynuŭsia pobač. Jon vyciahnuŭ mužčynu na bierah i adyšoŭsia ŭ bok, addychacca».
Alakandr kaža, što ŭ hety momant va ŭsich prysutnych było tolki adno pytańnie: «A što ciapier?»
«Žančyna hałasiła, maje siabry taksama stajali i razvodzili rukami. Ja padumaŭ: nu blin, va ŭsich ža ŭ škole byli ŭroki ABŽ, i pačaŭ rabić toje, pra što pisali ŭ padručnikach.
Ja nie ŭmieju rabić ni masaž serca, ni štučnaje dychańnie, ale nachiliŭsia nad im i sprabavaŭ štości rabić.
Niciskaŭ i naciskaŭ na hrudzinu, pakul nie pačuŭ, što niešta chrusnuła. Ja złamaŭ jamu rabrynu. Rabiŭ štučnaje dychańnie, pakul nie pačuŭ, što padjechała «chutkaja». Maje vusny da hetaha balać ad jaho zuboŭ. Na apošnim uzdychu z nosa mužčyna pajšła kroŭ. Ja padumaŭ, a raptam tak pavinna być, i jon ačuniaje.
Ale doktar, što pramacaŭ puls, skazaŭ tolki adno słova: «Śmierć».
Što ž rabić u takoj nadzvyčajnaj situacyi?
Dyśpietčar słužby 101 raskazaŭ, jakim pavinien być ałharytm dziejańniaŭ, pakul na miesca zdareńnia nie pryjedzie «chutkaja» dapamoha:
«Pa-pieršaje, kidacca ŭ vadu, kab vyratavać kahości, možna, tolki kali vy ŭpeŭnienyja va ŭłasnych siłach. Tamu što čałaviek, jaki tonie, znachodzicca ŭ stanie šoku, jon budzie čaplacca vam za šyju, kab vyratavacca samamu. Tamu, kali vy padpłyli da čałavieka, starajciesia schapić jaho zzadu».
Što rabić, kali vy vyciahnuli čałavieka na bierah, a jon biez prytomnaści?
- Pakładzicie jaho na śpinu, pad šyju padkładzicie što-niebudź, kab zafiksavać hałavu.
- Zaciśnicie čałavieku nos i ŭdychnicie ŭ rot pavietra try razy. Paśla dziesiać razoŭ naciskajcie na hrudnuju kletku.
- Mocna cisnuć nie treba, inakš možacie złamać čałavieku rabrynu.
«Reanimacyjnyja dziejańni, — kaža dyśpietčar MNS, — u ideale treba pravodzić udvaich. Adzin čałaviek robić dva ŭdychi, druhi — piać razoŭ naciskaje na hrudzi».
Kali čałaviek pryjšoŭ u siabie i pačaŭ adkašlivać vadu, paviarnicie jaho na bok, kab jon nie zachłynuŭsia.
«I adrazu addajcie ŭ ruki chutkaj dapamohi», — padsumavaŭ dyśpietčar.
Kamientary