Dzień horada ŭ Zasłaŭi budzie prasiaknuty kazackaj atmaśfieraj, u arhanizatarach śviata try rasijskija struktury, spryčyniŭsia i «Rumoł»
U Zasłaŭi 26 žniŭnia budzie adznačacca Dzień horada. Sioleta Zasłaŭju — horadu, zasnavanamu ŭ časy Rahniedy, — 1033 hady.
Ale kali pahladzieć na afišu, to ŭ vočy kidajecca «Kazačaja džyhitoŭka» i «Ansambl kazačaj pieśni». Heta taja kulturnaja prahrama, jakaja maje być na śviacie adnoj z kałysak biełaruskaj kultury?
Na afišy nazyvajucca arhanizatary śviata ŭ Zasłaŭi. Mierapryjemstva apłačvajecca arhanizacyjami pa prasoŭvańni ideałohii, vyhadnaj susiedniaj dziaržavie: «Domam Maskvy» i Rossupracoŭnictvam, u hetaj ža kahorcie idzie Departamient mižnarodnych suviaziaŭ Maskvy. Simvalična, što navat na hetaj afišy ŭłasna Zasłaŭski vykankam paznačany ŭ samym kancy.
Jak Zasłaŭje dajšło da takoha žyćcia, što prahrama haradskoha śviata vyznačajecca rasijanami? My adrasavali hetaje pytańnie staršyni Zasłaŭskaha harvykankama Śviatłanie Kartašovaj.
Jana nie zdoleła ničoha skazać pa sutnaści, z pryčyny «narady» paprasiła patelefanavać paźniej i pakłała słuchaŭku. Bolš na zvanki Kartašova nie adkazvała.
U pryjomnaj ža patłumačyli, što ideałahičnuju rabotu ŭ horadzie kuryrujuć u Minskim rajvykankamie, a kankretna — načalnik adździeła ideałohii Siarhiej Šabłyka.
U razmovie z «Našaj Nivaj» Šabłyka pakazaŭ poŭnuju nieabaznanaść u spravach padnačalenaj terytoryi:
«Heta rychtuje vykankam sumiesna z haradskim Domam kultury. Heta mierapryjemstva rajonnaha značeńnia, jak ja nazyvaju, źviarniciesia ŭ horad», — parekamiendavaŭ jon pa telefonie.
Admietna i inšaje — mierapryjemstva ŭ Zasłaŭi aktyŭna ŭzialisia pijaryć u internecie aktyvisty rasijskaj nacyjanalistyčnaj arhanizacyi «Rumoł», jakaja isnuje ŭ Biełarusi ŭ ščylnaj źviazcy z «Rossupracoŭnictvam».
Kiruje «Rumołam» nieanacyst Siarhiej Łušč, pra jaho my detalova raskazvali.
Čytajcie taksama: Nieanacyzm i zmahańnie z «juda-chryścijanskaj akupacyjaj»: śpiecmateryjał pra kiraŭnika «Rumoła» Siarhieja Łušča
Sprobami prasunuć rekłamu hetaha «Dnia horada» zajmajecca bližejšy paplečnik Łušča — Dźmitryj Piers.
Jak paviedamlajuć «Našaj Nivie» krynicy ŭ asiarodku redaktaraŭ bujnych supołak, učora hety čałaviek sprabavaŭ na biržy rekłamy «UKantakcie» prasunuć anons padziei ŭ Zasłaŭi.
«Zasłaŭje — najvybitny historyka-kulturny centr nie tolki Biełoruśsii, ale i Rasii», — pisaŭ jon.
Ale nivodnaja bujnaja minskaja supołka rekłamu nie ŭziała — heta była pazicyja redaktaraŭ. U pryvatnaści, pra heta nam skazaŭ administratar pablika «Heta Minsk, dzietka!».
Rekłama źjaviłasia tolki ŭ pabliku Zasłaŭja, dzie adrazu ž vyklikała nieadnaznačnuju reakcyju karystalnikaŭ.
Zdavałasia b, a pry čym tut «Rumoł»?
Jak paznačana na sajcie pasolstva Rasii ŭ Biełarusi, «Rumoł» jašče letaś zaśviaciŭsia jak arhanizatar niejkaha mierapryjemstva ŭ Zasłaŭi, ale tady heta prajšło niezaŭvažna.
Vidać, sioleta hetuju adyjoznuju arhanizacyju vyrašyli publična nie rekłamavać, ale jaje aktyvisty ŭsio roŭna abaznačyli siabie ŭ sprobach prasoŭvańnia rekłamy.
«Heta ŭsio sumna, heta padmiena biełaruskaj kultury i naviazvańnie čužynskaj, — miarkuje kiraŭnik «Art-siadziby», arhanizatar mnohich kulturnickich padziej Pavieł Biełavus. — Prablema, što ad našaj biednaści toj, chto daje hrošy, zamaŭlaje bankiet. Čynoŭniki nie dumajuć pra ideałahičnyja aśpiekty i pra niebiaśpiečnyja nastupstvy, jakija heta ŭsio niasie. Jak by rabiŭ ja? Mnie vielmi padabajucca takija festy, jak Viva Braslau, «Lid Bir», słovam, padziei, skiravanyja na papularyzacyju ŭnutranaha turyzmu. Zasłaŭje — heta patencyjał. Heta brend horada ź vialikim histaryčnym bekhraŭndam. Jakoje kazactva? Jaho tam nikoli nie było, nijakaj suviazi miž horadam i kazactvam niama. Treba było b dadać histaryčnaści, rycarskaj atmaśfiery, duchu horada, jaki staić napačatku biełaruskaj nacyi i śviadomaści. «Tut pačynałasia Biełaruś», — takim pasłańniem možna abjadnać Zasłaŭje i jašče šerah našych haradoŭ. Ja b raźvivaŭsia ŭ hetym kirunku».
«Chaj zaprašajuć Kasiu Kamockuju, Lavona Volskaha. Im biełaruskich hurtoŭ mała, treba kazaki? U nas jość kamu vystupać, paviercie, narodu budzie ŭ tysiaču razoŭ bolej, čym hledačoŭ kazackaj džyhitoŭki. Zasłaŭje treba pieratvaryć u miesca štohadovych rycarskich festaŭ, nijakich kazakaŭ nam nie treba», — raić były kiraŭnik Tavarystva biełaruskaj movy Aleh Trusaŭ.
Darečy, ciaham padrychtoŭki materyjała dopis z rekłamaj mierapryjemstva ŭ pabliku «Typovaje Zasłaŭje» źnik — jaho vydaliŭ administratar paśla skarhaŭ karystalnikaŭ.
Kamientary