ŚMI nazvali intervju Piatrova i Bašyrava pakarańniem za «pakinutyja ślady»

Krynicy The Telegraph ŭ brytanskim uradzie miarkujuć, što intervju Piatrova i Bašyrava było «pakarańniem» za niaŭdaču. Raniej «atručvalniki» raspaviali, što pryjechali ŭ Sołśbiery pahladzieć na znakamity sabor

Pa słovach krynic, inšyja viedamstvy rasijskich śpiecsłužbaŭ abvinavačvajuć Hałoŭnaje vyviedvalnaje upraŭleńnie (HRU, zaraz Hałoŭnaje ŭpraŭleńnie Hienštaba RF) u tym, što jaho supracoŭniki «zajšli zanadta daloka» z nastupstvami «sproby atručvańnia» byłoha aficera HRU Siarhieja Skrypala i jaho dački.

Brytanskija čynoŭniki, jakich cytuje hazieta, ličać, što dvoje padazravanych Skotłand-jardam u zamachu na Skrypala - Rusłan Bašyraŭ i Alaksandr Piatroŭ - byli vymušanyja dać intervju ŭ jakaści pakarańnia za «pakinutyja ślady padčas apieracyi». Havorka idzie pra toje, što jany patrapili na kamiery nazirańnia, vykarystoŭvali hramadski transpart, i pakinuli fłakon z-pad «Navička».

U pačatku vieraśnia Skotłand-Jard nazvaŭ Bašyrava i Piatrova padazravanymi ŭ zamachu na Siarhieja Skrypala i jaho dačku Juliju. Brytanskaja palicyja pakazała fatahrafii ich pierasoŭvańniaŭ pa Sołśbiery, a taksama fłakon z-pad parfumy Nina Ricci, u jakim pieravoziŭsia «Navičok». Premjer-ministr Brytanii Tereza Mej nazvała Bašyrava i Piatrova supracoŭnikami HRU.

12 vieraśnia Uładzimir Pucin źviarnuŭsia da «atručvalnikaŭ» Skrypaloŭ. Jon skazaŭ, što Kreml znajšoŭ ich i prapanavaŭ Bašyravu i Piatrovu samim źjavicca ŭ ŚMI. «Ničoha tam asablivaha i kryminalnaha niama», - skazaŭ Pucin.

Na nastupny dzień Bašyraŭ i Piatroŭ dali intervju hałoŭnamu redaktaru RT. Jany skazali, što na fotazdymkach, pradstaŭlenych Łondanam, sapraŭdy jany. Pa słovach Bašyrava i Piatrova, u Sołśbiery jany pryjechali pahladzieć na znakamity sabor. Bašyraŭ i Piatroŭ admaŭlali, što jany mieli pry sabie fłakon z atrutnym rečyvam, roŭna jak i śćviardžeńni, što jany pracujuć na HRU. Jany skazali, što źjaŭlajucca biźniesmienami «siaredniaj ruki», jakija handlujuć spartovym charčavańniem. Tym časam kampanij, zarehistravanych na Bašyrava i Piatrova, niama.

Paźniej hrupa rasśledvalnikaŭ Bellingcat apublikavała pašpartnaje daśje Piatrova, na jakim staić štamp «źviestak nie davać» i kod 195-76-66. Na advarotnym baku dakumienta paznaka - «jość list S.S.». Takija ž słovy jość na zajavie Piatrova na zamienu pašparta, jakoje apublikavała Bi-bi-si. I ŭ Bellincat, i ŭ Bi-bi-si ličać, što «S.S», rasšyfroŭvajecca jak «całkam sakretna», što kaža ab prynaležnaści da śpiecsłužbaŭ. Žurnalistam, jakija patelefanavali pa numary, paznačanym u zajavie Piatrova, adkazali, što jany trapili ŭ Minabarony Rasii.

• 0
• 0
• 0
• 0
• 0
• 0
• 0
• 0