Apytańnie: 86% šanujuć biełaruskuju movu, hanaracca Biełaruśsiu i hatovyja baranić krainu ŭ vypadku vajny
U miežach prajekta «Raźvićcio Kastryčnickaha ekanamičnaha forumu» było praviedziena sacyjałahičnaje apytańnie, pryśviečanaje kaštoŭnaściam i pohladam biełarusaŭ. U im paŭdzielničała kala tysiačy čałaviek — tradycyjnaja vybarka dla Biełarusi.
Daśledavańnie było praviedziena kampanijaj MIA Research u mai-červieni 2018 hoda.
Častka apytańnia była pryśviečanaja biełaruskaj movie. Amal 66% respandentaŭ chočuć, kab ich dzieci viedali biełaruskuju hetak ža dobra, jak i ruskuju (adpaviedna, 34% — nie chočuć).
Vartaja ŭvahi praporcyja 86% — 14%, jana sustrakajecca ŭ troch pytańniach zapar.
86% apytanych ličać, što biełaruskaja mova — važnaja častka kultury, jakuju abaviazkova treba zachavać. Stolki ž čałaviek kažuć, što hanaracca Biełaruśsiu. I stolki ž hatovyja zmahacca za svaju krainu ŭ vypadku vajny.
Adpaviedna, 14% nie hanaracca Biełaruśsiu, nie hatovyja zmahacca za krainu i ličać nacyjanalnuju movu pamierłaj.
Praŭda, tolki 2,2% razmaŭlajuć doma tolki na biełaruskaj. Jašče kala 22% — ci na dźviuch movach ci na ich sumiesi, a bolšaść — 73% — pa-rusku.
Prablemami sučasnaj Biełarusi bolšaść nazvała rost cenaŭ, nizki ŭzrovień dachodaŭ, ałkahalizm, biespracoŭje, košty na žyllo i pasłuhi ŽKH.
Cikava, što, kab stać bahatym biełarusam, apytanyja ličać, treba mieć nie tolki rozum ci luboŭ da pracy, ale i patrebnyja suviazi.
Pałova apytanych za apošnija try hady ni razu nie była za miažoj.
Hramadskaha hańbavańnia, na dumku biełarusaŭ, zasłuhoŭvajuć pieradusim chatni hvałt i narkamanija. Ale nie tolki jany, a jašče i homaseksualizm (55%) i aborty (33%).
Pry hetym 78% apytanych ličać siabie pravasłaŭnymi (5,6% — kataliki). Praŭda, biezumoŭna vierać u boha tolki 36%, jašče 26% chutčej vierać, ale majuć sumnievy.
Narešcie, chodziać u carkvu chacia b raz na miesiac tolki 15% apytanych.
Absalutnaja bolšaść respandentaŭ paviedamiła, što jany chutčej ščaślivyja (68%) ci navat vielmi ščaślivyja ludzi (19%).
Ciapier čytajuć
U Francyi ad śpioki zahinuŭ dalnabojščyk z Dokšycaŭ11
Kamientary