Šoŭmien Uładzimir Zialenski maje niezadekłaravanuju 15-pakajovuju viłu ŭ italjanskim horadzie Forte-dej-Marmi, paviedamlaje «Ślidstvo.Info».
Adznačajecca, što kandydat u prezidenty Ukrainy ŭkazaŭ u dekłaracyi 4 kvatery ŭ Kijevie, zaharadny dom, a taksama kvatery ŭ Jałcie i Vialikabrytanii.
Ale Zialenski nie ŭspomniŭ pra viłu ŭ Italii, jakoj, pavodle žurnalistaŭ, jon vałodaje razam z žonkaj Alenaj.
Pavodle dakumientaŭ, atrymanych žurnalistami, u 2017 hodzie italjanskaja firma San Tommaso S.R.L., zadekłaravanaja Zialenskim, nabyła 15-pakajovy dom u taskanskim miastečku Forte-dej-Marmi.
Dom znachodzicca za 600 mietraŭ da mora — vosiem chvilin pieššu da plaža. Firma zapłaciła za jaho 3,8 miljona jeŭra.
U svaju čarhu pieradvybarčaja kamanda kandydata ŭ prezidenty Uładzimira Zialenskaha zajaviła, što pa zakonie jon nie abaviazany dekłaravać svaju italjanskuju viłu, pra jakuju pisali žurnalisty-śledčyja. Pra heta havorycca na Facebook-staroncy «Kamanda Zialenskaha».
«Uličvajučy toje, što Uładzimir Zialenski nie zajmaje ni adnoj z pasad na dziaržaŭnaj słužbie, u jaho nie było i niama abaviazku dekłaravać nieruchomaść, uładalnikam jakoj źjaŭlajecca kampanija, zasnavanaja Uładzimiram», — adznačajecca ŭ zajavie.
Akramia taho, adznačajuć aŭtary zajavy, śćviardžeńnie žurnalistaŭ pra 15 pakojaŭ viły — fejk, praŭda nie havorać, kolki ŭ budynku nasamreč pamiaškańniaŭ.
«Heta tolki dadatkovaje paćvierdžańnie cyničnaha paklopu. Mahli b užo i 150 pakojaŭ napisać, dla bolš «siensacyjnych» zahałoŭkaŭ», — aburajucca ŭ Zialenskaha.
Kamientary