Bolšaść zatrymanych u Breście adpuścili: sud projdzie napiaredadni nastupnaj akcyi pratestu
Ranicaj 15 krasavika ź izalatara Leninskaha RAUS pačali vychodzić žychary Bresta i Bresckaha rajona, bolšaść ź jakich zatrymali ŭ piatnicu, kali jany pryjšli ŭ milicyju pa pozvach u jakaści śviedak, paviedamlaje Bresckaja hazieta.
Čakałasia, što ŭsich zatrymanych, jak zvyčajna, pryviazuć u sud na vulicu Levanieŭskaha, ale sudździa Alaksandr Siemiančuk z sakratarom sam pryjechaŭ u RAUS.
Pieršaj adpuścili Taćcianu Fiesikavu, jakuju zatrymali ŭčora. Sud nad joj za razdaču na płoščy Lenina žoŭtych šarykaŭ projdzie 25 krasavika.
Dvuch zatrymanych aktyvistaŭ pakarali štrafami. Mikałaj Traciuk atrymaŭ 10 bazavych vieličyniaŭ štrafu (255 rubloŭ) za akcyju 14 krasavika, a Aleh Jarmolenka — 30 bazavych (765 rubloŭ) za akcyju 7 krasavika.
Da abiedu z RAUS z pozvami na 18 krasavika vyjšli Dziamjan Lepiasievič, Aleh Viałaŭ, Dzianis Małašanka, Dźmitryj Andrasiuk, Siarhiej Śvirski, Uładzisłaŭ Abramovič, Uładzimir Kazłoŭski i pravaabaronca Uładzimir Vialičkin. Ich buduć sudzić za šeście 7 krasavika pa vulicy Savieckaj i Mašerava. Tady kałona ź niekalkich socień praciŭnikaŭ akumulatarnaha zavoda prajšła pa horadzie z łozunhami suprać zavoda.
Dźmitryj Biekaluk byŭ aštrafavany na adnu bazavuju vieličyniu. Sud uličyŭ, što ŭ Dźmitryja dvoje małych dziaciej, maci-invalid i z ulikam adbytych sutak.
Pozvy na 18 krasavika aznačajuć, što sudzić ludziej majuć roŭnieńka napiaredadni čarhovaha «karmleńnia hałuboŭ», jakoje praciŭniki akumulatarnaha zavoda ładziać u niadzieli na centralnaj płoščy horada.
Sotni ludziej iznoŭ prajšli šeściem u Breście, niahledziačy na aryšty. Ludziej zatrymlivali na vulicach, ich adbivali VIDEA
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud12
Kamientary