Pamiatajecie historyka z Harodni, jakaja daśledavała seks u VKŁ? Jana stała… astrołaham
Historyk z Harodni Natalla Śliž viadomaja svaimi daśledavańniami biełaruskaha siamiejnaha prava. Naprykład, pracaj pra šlubnyja i pazašlubnyja stasunki šlachty Vialikaha Kniastva Litoŭskaha ŭ XVI-XVII stahodździ. Ale niadaŭna historyk avałodała jašče adnoj prafiesijaj. Natalla Śliž stała astrołaham.
Astrałohijaj Natalla zacikaviłasia bolš za čatyry hady tamu. Spačatku prosta čytała artykuły pa temie, a potym pieraklučyłasia na prafiesijnuju litaraturu.
«Ja samavučka, nie atrymlivała śpiecyjalnuju adukacyju. Tamu što ŭ hetaj halinie kali chto i vydaje dypłomy i siertyfikaty, dyk heta pryvatnyja asoby, jakija dasiahnuli peŭnaha ŭzroŭniu», — tłumačyć jana.
Čym historyka pryciahnuła astrałohija?
«Luby čałaviek choča sam z saboj razabracca. Napeŭna, astrałohija najlepšym čynam adkazała na maje pytańni, čamu ŭsio adbyvajecca tak, a nie inakš. Heta dobry instrumient dla daśledavańnia i siabie, i padziej», — miarkuje daśledčyca.
Natalla dadaje, što z astrałohijaj možna «kansultavacca» navat nakont zdaroŭja. Jana ŭpeŭniena, što ŭ haraskopie zakładzieny prablemnyja zony, padkazvajecca, na jakija orhany treba źviartać uvahu.
Daviarać pradkazańniam, što drukujucca ŭ časopisach i hazietach, Natalla nie raić — jany zanadta ahulnyja. Zatoje ź piersanalnaha haraskopa možna daviedacca, kali skončycca prablemny pieryjad, nakolki zaraz udały čas dla peŭnych pačynańniaŭ ci jak projdzie vandroŭka, zapłanavanaja na nastupny tydzień:
«Zvyčajna ludziej turbuje karjera, zdaroŭje, asabistaje žyćcio. Cikaviać pytańni samaraźvićcia — ź jakim patencyjałam naradziŭsia, jakija baki mocnyja, jakija słabyja, čym lepš zaniacca».
Toje, što da astrałohii jak da navuki staviacca skieptyčna, haradzienku nie biantežyć.
«Ja vielmi spakojna heta ŭsprymaju. Skieptyčna staviacca tyja, chto navat nie viedaje, što takoje astrałohija. Bo što ŭ nas ludzi viedajuć pra jaje, akramia narodnych kalendaroŭ? Hetak ža možna skazać, što i fizika nie navuka, bo my nie bačym atamaŭ», — tłumačyć jana.
Svaju novuju prafiesiju Natalla sumiaščaje z pracaj historyka.
«Dla mianie było vialikim ździŭleńniem, što za miažoj abaraniajucca pracy pa historyi astrałohii, pryčym dastatkova daŭno. Heta ličycca absalutna narmalnaj tematykaj. Ja znachodziła ŭ archivach univiersitetaŭ Złučanych Štataŭ takija dysiertacyi, mnohija ź ich fiłasofska-kanceptualnaha płanu», — raskazvaje Natalla.
Pa słovach daśledčycy, u nas jość navukovyja pracy, źviazanyja z narodnaj astrałohijaj. Ale hruntoŭnych daśledavańniaŭ pa historyi astrałohii ŭ Biełarusi nichto nie pravodziŭ. Tamu joj budzie pra što pisać.
«U rukapisach ja sustrakała astrałahičnyja zhadki, u dziońnikach znakamitych asob. Naprykład, u miedyka Macieja Vorbieka Letava (Maciej Vorbek-Lettow) — daktary ŭ toj čas pracavali z astrałohijaj, bo bieź jaje było niemahčyma vyznačyć mietady lačeńnia. Haraskopy treba było viedać i dla chirurhičnych apieracyj, i kab razumieć, jak projdzie praces vyzdaraŭleńnia. Dy i ciapier jość taki kirunak jak miedycynskaja astrałohija», — padsumoŭvaje daśledčyca.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary