Pieršy ŭ Biełarusi kabiniet lačeńnia bolu adkryvajecca na bazie Mahiloŭskaj lakarni № 1, paviedamlaje Mogilevnews. Jon abstalavany nieabchodnaj technikaj, a jaho zahadčyk doktar-aniestezijołah-reanimatołah balnicy Siarhiej Hapanovič i jaho kalehi ŭžo akazvajuć śpiecyjalizavanuju dapamohu pieršym pacyjentam, jakija majuć patrebu ŭ sistemnym lačeńni chraničnaha bolevaha sindromu.
— Miedycyna bolu — vielmi važny napramak achovy zdaroŭja ŭsich pieradavych krain śvietu, jaki intensiŭna raźvivajecca, — raspaviadaje namieśnik hałoŭnaha lekara balnicy Alaksiej Ščarbinski. — Niaredka lekary sutykajucca ź situacyjaj, kali bol nie prosta simptom chvaroby, a sam źjaŭlajecca chraničnaj patałohijaj, mučyć čałavieka hadami i patrabuje peŭnaha lačeńnia (boli śpiny, hałavy, tazavyja…). Pa mižnarodnaj statystycy kožny piaty žychar płaniety pakutuje ad chraničnaha bolevaha sindromu. U mnohich krainach hetaj prablemaj zajmajucca kabiniety i kliniki bolu. U Estonii, naprykład, z nasielnictvam mienš za paŭtara miljona čałaviek funkcyjanuje bolš za 10 kabinietaŭ bolu.
Siarhiej Hapanovič pracuje ŭ hetym kirunku ŭžo bolš za 5 hadoŭ. Stažyravaŭsia ŭ šerahu krain, u tym liku ŭ klinicy bolu ŭ Kiolnie. Siońnia lačeńniem chraničnaha bolevaha sindromu zaniaty nie tolki jon, jaho kalehi aniestezijołahi-reanimatołahi, ale i lekary inšych adździaleńniaŭ balnicy. Padtrymlivajuć doktara Hapanoviča i jaho kalehaŭ u hetych raspracoŭkach administracyja balnicy i hałoŭny aniestezijołah-reanimatołah krainy Alaksandr Dziadźko. A ŭ minułym hodzie Siarhiej Uładzimiravič atrymaŭ hrant Łukašenki na raźvićcio temy. I voś zaraz adkryćcio pieršaha ŭ Biełarusi kabinieta lačeńnia bolu — paśpiachovaja realizacyja hetaha prajekta.
Kamientary