Makiej — Rynkievičsu: U adnosinach Biełarusi i Łatvii nie isnuje pryncypovych prablem
U dvuchbakovych adnosinach pamiž Biełaruśsiu i Łatvijaj nie isnuje pryncypovych prablem. Pra heta zajaviŭ kiraŭnik biełaruskaha źniešniepalityčnaha viedamstva Uładzimir Makiej siońnia na pieramovach ź ministram zamiežnych spraŭ Łatvii Edharam Rynkievičsam, jaki 24-26 lipienia naviedvaje Biełaruś z rabočym vizitam, pieradaje BIEŁTA.
Kiraŭnik biełaruskaha źniešniepalityčnaha viedamstva padkreśliŭ, što biełaruska-łatvijskija kantakty stanoviacca rehularnymi, u tym liku i abmien vizitami. Akramia hetaha prachodziać i sustrečy pamiž pradstaŭnikami dźviuch krain na mižnarodnych placoŭkach. Uładzimir Makiej akcentavaŭ uvahu na ŭstalavanych ciesnych kantaktach nie tolki pamiž ministerstvami zamiežnych spraŭ dźviuch dziaržaŭ, ale i inšymi viedamstvami. Pavodle jaho słoŭ, heta spryjaje ŭsiebakovamu pahłybleńniu supracoŭnictva va ŭsich śfierach.
Ministr zajaviŭ, što biełaruski bok całkam padtrymlivaje raźvićcio palityčnaha dyjałohu i naceleny na pašyreńnie dvuchbakovych kantaktaŭ.
Jon taksama adznačyŭ, što pryncypovych prablem u dvuchbakovych adnosinach nie isnuje i jość hatoŭnaść adkryta abmiarkoŭvać adčuvalnyja pytańni.
Kiraŭnik MZS Łatvii skazaŭ ab pazityŭnaj atmaśfiery dvuchbakovych adnosin u palityčnaj, ekanamičnaj śfierach, u ramkach «Uschodniaha partniorstva» i rehijanalnaj biaśpieki. Pavodle jaho słoŭ, udałosia vypracavać adpaviedny farmat supracoŭnictva, kali majecca vysoki ŭzrovień ŭzajemnaha davieru. U liku pazityŭnych momantaŭ ministr nazvaŭ abmien infarmacyjaj u vajennaj śfiery i abmien naziralnikami padčas vučeńniaŭ u Biełarusi i Łatvii.
Edhar Rynkievičs taksama źviarnuŭ uvahu, što majecca šmat pytańniaŭ, jakija Biełaruś i Łatvija adkryta abmiarkoŭvajuć, u tym liku i tyja, pa jakich jość roznahałośsi.
Jon vykazaŭ upeŭnienaść, što pieramovy ŭ Minsku buduć dziejsnymi i daduć dobry impuls dla dalejšaha raźvićcia biełaruska-łatvijskaha supracoŭnictva.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary