«Na viasielli płacili za pavietra i kidali bukiet z armaturaj». Maładziony ź Minska zładzili viasielle pad vadoj FOTA, VIDEA
«Heta ŭsio Anton, moj ciapier užo muž prydumaŭ», — dzielicca Jana Pilipčuk, minčanka, jakaja skazała «tak» pad vadoj.
«Spačatku ja dumała, što ŭsio heta žart: viasielle pad vadoj, akvałanhi, pytańni ab tym, jak budziem raśpisvacca ŭ vadzie… A paśla taho, jak naš instruktar pa dajvinhu Alaksandr Nazaraŭ staŭ usio ŭsurjoz praličvać, ja zrazumieła, što sapraŭdy vychodžu zamuž pad vadoj», — kaža Jana.
Jana pryznajecca, što luboŭ da dajvinhu ŭ jaje ŭźnikła niečakana, razam sa źjaŭleńniem u jaje žyćci Antona.
«Na 14 lutaha jon mnie padaryŭ siertyfikat na pahružeńnie. Ja i da hetaha lubiła vadu, a ciapier dakładna mahu skazać, što heta maja stychija. A kali Anton prapanavaŭ uziać šlub u vadzie, ja padumała, nu kali ja hatovaja z čałaviekam i ŭ ahoń, i ŭ vadu, to heta sapraŭdnaje kachańnie», — dzielicca Jana.
Prapanovy vyjści zamuž, pryznajecca Jana, jana tak i nie atrymała. Prosta Anton chutka ŭsio vyrašyŭ razam ź instruktaram, a Janu papiaredzili pra toje, što ŭ jaje viasielle, za piać dzion da ŭračystaści.
«Akazvajecca, da viasiella całkam možna padrychtavacca za piać dzion. Sukienku ja kupiła na «Kufary» za 70 rubloŭ. Pakolki rośpis byŭ pad vadoj, my zekanomili na fatohrafach i apieratarach — nas zdymali siabry, u jakich była admysłovaja technika. Z pryčoskaj i makijažam byli składanaści. Vizažysty i cyrulniki, katorym ja telefanavała, admaŭlalisia. Adnyja kazali, što heta vielmi składana dla ich, druhija prosta dumali, što ja žartuju i kidali trubku. Zatoje maje siabroŭki ŭdziačnyja za toje, što ja taksama im zekanomiła hrošy. Nie spatrebilisia ni ŭkładki, ni makijaž».
«Daražej za ŭsio nam abyšłasia arka z žyvych kvietak, za jaje my zapłacili kala 300 rubloŭ. My ž chacieli, kab usio było pryhoža pad vadoj, kab tam u nas była sapraŭdnaja cyrymonija, a nie abmien piarścionkami. A! I za pavietra daviałosia zapłacić pa 20 rubloŭ na čałavieka», — śmiajecca Jana.
Ahułam cyrymonija pad vadoj na hłybini 6 mietraŭ doŭžyłasia amal hadzinu.
Za hety čas u maładych spytalisia, ci zhodnyja jany pabracca šlubam. Dla hetaha razdrukavali śpiecyjalnyja tablički, jakija viadučy cyrymonii, a im byŭ instruktar Antona i Jany pa dajvinhu Alaksandr Nazaraŭ, pakazvaŭ maładym. A tyja družna ŭ adkaz padniali tabličku sa słovam «tak». Paśla maładyja ŭ vadzie abmianialisia piarścionkami, zatym adbyŭsia pieršy taniec maładych, paśla tam ža, pad vadoj, prymali vinšavańni ad svajakoŭ i siabroŭ, nu i, kaniečnie ž, niaviesta kidała bukiet.
«Bukiet ja svoj zabyłasia la basiejna, tamu siabroŭki łavili bukiet užo na pavierchni vady. Ale, kab jon dapłyŭ pa vadzie, daviałosia dadavać u bukiet kavałak armatury. Siabroŭka, što złaviła bukiet, pažartavała, što ciapier taksama budzie vymušanaja raśpisvacca pad vadoj», — kaža Jana.
Naohuł, źjaŭleńnie niaviesty ŭ raździavałcy basiejna nie prajšło niezaŭvažanym.
«Naturalna, ludzi, što byli ŭ toj dzień u akvaparku, až mirhali, kali bačyli mianie. Niaviesta ŭ velumie ŭ basiejnie, što heta? I pakul doŭžyłasia cyrymonija, u akvaparku nichto nie płavaŭ. Usie dzivilisia na nas, stojačy la parenčaŭ basiejna», — raskazvaje Jana.
Praz dva tydni paru čakaje aficyjny rośpis u ZAHSie, a paśla Jana i Anton znoŭ voźmuć akvałanhi i pajeduć u miadovy miesiac u Jehipiet, kab i jaho pravieści pad vadoj.
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary