«Pavodzili siabie byccam bahi z Alimpa»: udzielniki spravy ab karupcyi ŭ školnych stałoŭkach skardzilisia Viktaru Łukašenku na KDB
U Minskim abłasnym sudzie praciahvajecca razhlad druhoj spravy ŭ dačynieńni da eks-kiraŭnika Hałoŭnaha ŭpraŭleńnia spažyvieckaha rynku Minharvykankama Siarhieja Barysieviča i eks-dyrektara kambinata školnaha charčavańnia Leninskaha rajona Branisłava Roślika.
U čaćvier było ahučana, što supracoŭniki kambinataŭ školnaha charčavańnia Leninskaha, Maskoŭskaha i Zavodskaha rajona, jakija prachodziać pa spravie, pisali na imia pamočnika prezidenta pa nacyjanalnaj biaśpiecy Viktara Łukašenki listy. Jany skardzilisia na niezakonnyja dziejańni supracoŭnikaŭ dziaržbiaśpieki.
«Vyniki razhladu zvarotu nazvanych asob dałožany va ŭstanoŭlenym paradku kiraŭniku dziaržavy», — zajaviŭ sudździa.
Kopii zvarotaŭ dałučanyja da materyjałaŭ spravy.
Pavodle infarmacyi tut.by, supracoŭniki stałovak i KŠCH u svaich listach skardzilisia na supracoŭnikaŭ Upraŭleńnia KDB pa Minsku i Minskaj vobłaści. «Supracoŭniki pavodzili siabie byccam bahi z Alimpa», pisali jany. U pryvatnaści, kadebisty kazali vyklikanym na dopyt, što dyrektar KŠCH Leninskaha rajona žyvym z turmy nie vyjdzie.
Siarod inšych skarhaŭ — dopyty ŭ žorstkich umovach, maralny cisk z tym kab ahavaryła Roślika, zapałochvańnie kajdankami i zbrojaj, zatrymańniem muža i žonki (u niekatorych u sistemie pracavali niekalki členaŭ siamji) i pieradačaj dziaciej orhanam apieki.
«Paśla zatrymańnia Branisłava Roślika supracoŭniki KDB prajechali pa stałovych i pahražali zahadčykam vytvorčaściu - patrabavali paćvierdzić, što Rośliku pieradavali hrošy. Kazali, što jon pryznaŭsia i pahražali aryštam u vypadku admovy paćvierdzić pieradaču», - havorycca ŭ adnym ź listoŭ.
Hramadzianam Ukrainy, uciekačam z Łuhanskaj vobłaści, u KDB pahražali departacyjaj.
«Pavodzili siabie hruba, upivalisia svajoj uładaj», - skardziacca pracaŭniki KŠCH.
Pry hetym niekatoryja taksama pakazvali, što supracoŭniki KDB «uviali ŭ zman prezidenta, Alaksandra Ryhoraviča Łukašenku, što kormim dziaciej adkidami».
Pra toje, ci pryniatyja niejkija miery i što pakazali pravierki skarhaŭ, u sudzie nie paznačyli.
Ciapier čytajuć
35‑hadovy dalnabojščyk ź Biełarusi raptoŭna pamior u Kitai. Heta muž samaj tytułavanaj biełaruskaj dziudaistki3
Kamientary