Dyrektarka biełaruskamoŭnaj himnazii u Dziaržynsku atrymała vymovu za rasijskamoŭnyja kłasy
Dyrektarka biełaruskamoŭnaj himnazii Dziaržynska Ludmiła Paŭchleb atrymała vymovu za kłasy z rasijskaj movaj navučańnia, piša Radyjo Svaboda.
Takim čynam ułady adreahavali na pietycyju suprać rusifikacyi dziaržynskaj himnazii, jakaja źjaviłasia na petitions.by u kastryčniku i sabrała 681 podpis. Paśla zboru podpisaŭ pietycyju nakiravali ŭ Ministerstva adukacyi Biełarusi.
Čaho damahalisia ŭ pietycyi
U Dziaržynsku jość 2 škoły i 2 himnazii. Tolki adna z 4 navučalnych ustanovaŭ da niadaŭniaha času ličyłasia biełaruskamoŭnaj — himnazija horada Dziaržynska. Adnak u 2019 hodzie ŭ jaje nabrali čatyry rasijskamoŭnyja kłasy i adzin biełaruskamoŭny, adznačajuć u pietycyi. Spravavodstva taksama pieraviali pieravažna na rasijskuju movu.
U pietycyi adznačajuć, što, choć «dziaržava nam harantuje (pavodle zakanadaŭstva) raŭnapraŭje dźviuch dziaržaŭnych movaŭ», sioleta tolki 10% pieršakłaśnikaŭ u Dziaržynsku mohuć vučycca pa-biełarusku, tamu «biełaruskaja i rasijskaja movy znachodziacca abjektyŭna ŭ niespraviadlivych umovach».
U pietycyi prasili:
- Viarnuć biełaruskamoŭnaje navučańnie va ŭsie pačatkovyja kłasy himnazii h. Dziaržynsku.
- Viarnuć viadzieńnie spravavodstva administracyjaj, nastaŭnikami i vučniami (zapaŭnieńnie navučalnych płanaŭ, dziońnikaŭ i h.d.) na biełaruskaj movie.
Jak na pietycyju adkazali ŭłady
Adkaz na pietycyju pryjšoŭ z Hałoŭnaha ŭpraŭleńnia adukacyi Minabłvykankama. U im adznačajecca, što «himnazija dziejničaje na padstavie statutu (p. 1 art. 22 Kodeksu ab adukacyi). Navučańnie ŭ joj ažyćciaŭlajecca na biełaruskaj movie, vychavańnie — na biełaruskaj i rasijskaj movach».
«Za parušeńnie pravavych narmatyŭnych dakumientaŭ pry arhanizacyi pryjomu ŭ pieršuju kłasu dyrektaru himnazii Paŭchleb Ł. S. abjaŭlena vymova», — havorycca ŭ adkazie.
Taksama ŭ dakumiencie adznačajecca, što «zamiena biełaruskaj movy navučańnia na rasijskuju ŭ himnazii nie płanujecca» i što miascovamu ŭpraŭleńniu adukacyi, sportu i turyzmu «rekamiendavana zabiaśpiečyć dziejsny kantrol za vyznačeńniem biełaruskaj movy navučańnia pry farmavańni kantynhientu navučencaŭ i sietki ŭstanovaŭ adukacyi».
Kamientary