«Trusik DžoDžo» — heta trahikamiedyja pra chłopčyka Džodžo Beclera z «Hitleriuhienda», jaki maryć trapić na vajnu.
Niaŭkludny 10-hadovy niamiecki chłopčyk DžoDžo, jaki straciŭ baćku, sprabuje znajści svajo miesca ŭ śviecie. Adnahodki kpiać ź jaho, a mama miarkuje, što dzicia samo sabie vydumlaje prablemy. A chłopčyk choča mieć baćku i pačynaje mieć znosiny z ujaŭnym inšym — Adolfam Hitleram, jaki zusim nie padobny da znajomaha ŭsim fiurara Treciaha rejcha.
«Ja daŭno tak nie śmiajaŭsia z nacystaŭ i Hitlera, — piša ŭ siabie ŭ fejsbuku žurnalist Dźmitry Hurnievič. — Tam ad kožnaj sceny z Adolfam možna lažać pokatam. A potym DžoDžo adkryvaje, što ŭ ichnaj kvatery chavajecca habrejskaja dziaŭčyna. I tut jon pačynaje razumieć, što heta… takija samyja ludzi, chacia dziaŭčynka i strašyć jaho pa prykole, što habrei śpiać jak kažany, dahary nahami. Ale hetaje adkryćcio adbyvajecca nie tak banalna, jak ja tut pišu. Heta treba ŭbačyć.
Heta film pra toje, jak mozh ludziej pieratvarajuć u miakinu, jak ludzi prymajuć za dohmu toje, z čaho varta parahatać. «Adzin moj siabra sustreŭ ruskich i jany jaho źjeli» - kaža adna z hierainiaŭ filmu. «My tut tydzień tamu złavili ŭ lesie habreja i ja skažu tabie pad sakretam, što jon ničym nie adroźnivaŭsia ad nas. Nie razumieju, z čaho ŭsia hetaja šura-bura», — kaža DžoDžo inšy siabručok z «Hitleriuhienda». Toje, jak zrobleny hety film, hratesk i trahikamiedyja — na maju dumku, adzin ź vielmi dobrych sposabaŭ raskazvać dzieciam va ŭzroście maich pra važnyja rečy.
U filmie jość tema i dla darosłych. Pra toje, jaki śmiešny nasamreč fanatyzm, kali pahladzieć na jaho z boku, — piša Hurnievič.
«Tabie tolki 10 hadoŭ, ty nie pavinien dumać pra vajnu i palityku. Dzieci pavinny łazić pa drevach i padać ź ich, — kaža chłopčyku mama, kali toj pierakonvaje jaje, što fiurar pieramoža ŭ vajnie. — Žyćcio — heta dar, treba jaho canić. Treba tancavać, kab pakazać Bohu, jak my ŭdziačnyja jamu za žyćcio».
Režysior Tajka Uajcici (Novaja Ziełandyja), vytvorčaść ZŠA, 2019.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam11
Kamientary