Kiraŭnik Jeŭrapiejskaha banka rekanstrukcyi i raźvićcia (JEBRR) Suma Čakrabarci paraiŭ Alaksandru Łukašenku naviedać bolš jeŭrapiejskich krain. Pra heta bankir raspavioŭ žurnalistam paśla sustreč z kiraŭnictvam Biełarusi, piša Tut.by
- Na sustrečy z prezidentam Biełarusi ja skazaŭ pra jaho paśpiachovy vizit u Aŭstryju (u listapadzie). Heta adznačyli šmatlikija naziralniki, u tym liku i ŭ Łondanie. Ja rekamiendavaŭ [Alaksandru Łukašenku] razhledzieć mahčymaść naviedać inšyja dziaržavy jak u Jeŭrasajuzie, tak i za jaho miežami, — skazaŭ Čakrabarci.
Taksama Čakrabarci paraiŭ paśpiachova pravieści ŭ mai ŭ Łondanie forum dla zamiežnych inviestaraŭ pa mahčymaściach inviestavańnia ŭ Biełaruś, a vosieńniu ŭ Minsku — pieršaje pasiadžeńnie Rady pa zamiežnych inviestycyjach pry prezidencie Biełarusi.
— Było b niabłaha adpravicca na hetyja sustrečy i niešta zajavić, — skazaŭ Čakrabarci, majučy na ŭvazie zaklučeńnie ździełki pa ŭvachodžańni JEBRR u kapitał Bielinviestbanka.
Varta adznačyć, što raniej radu pa zamiežnych inviestycyjach płanavałasia pravieści 7 lutaha. Adnak, miarkujučy pa ŭsim, inviestaram nie było čaho prademanstravać. JEBRR u najbližejšyja tydni płanuje zaviaršyć pieramovy z uładami Biełarusi ab nabyćci pakieta akcyj Bielinviestbanka, paviedamiŭ Suma Čakrabarci.
— My spadziajemsia, što heta budzie maksimalna zbałansavanaja ŭhoda. Budzie ŭličvacca, što heta piłotnaja ŭhoda, jakaja stanie prykładam dla ŭsich nastupnych, — skazaŭ prezident JEBRR.
Hałoŭny ekanamist JEBRR Bieata Javorčyk ličyć, što Biełaruś «ciapier časta budzie zhadvacca ŭ navinach».
— U Biełarusi jość dobraja mahčymaść zajavić pra siabie, što vy adkrytyja da novaha biznesu, novych inviestaraŭ. Što vy hatovy zaprašać nie pa palityčnych, a pa vyklučna ekanamičnych mierkavańniach, — skazała Javorčyk. — Pramyja zamiežnyja inviestycyi (PZI) treba razhladać nie tolki jak prytok kapitału, a pryciahnieńnie nou-chau, novych viedaŭ. Vopyt pakazvaje, što zamiežnyja inviestary bolš enierhaefiektyŭnyja, čym ich kalehi, jakija prysutničajuć u krainie.
Kamientary