Miadźviedzieŭ prapanavaŭ Łukašenku źvieryć hadzińniki. Pa Maskvie?

Učora Miadźviedzieŭ prapanavaŭ Łukašenku «źvieryć hadzińniki». Banalnaść atrymałasia dvuchsensoŭnaj. U nas ža roznyja hadzinnyja pajasy. I naš čas, kali chočacie, bolej jeŭrapiejski.

Kali byŭ anansavany vizit biełaruskaha kiraŭnika da patryjarcha Kiryły, analityki azadačylisia. Niejak słaba vieryłasia, što taki prahmatyčny palityk, jak Łukašenka, na fonie šalonaha deficytu zamiežnaha handlu, dzikaha padzieńnia ekspartu, u tym liku i značnych strat na rasijskim rynku, raptam adkinuŭ materyjalnaje — i tak zakłapaciŭsia duchoŭnym jadnańniem.

Kaniečnie, RPC blizkaja da Kramla, i patryjarcha možna ličyć dastatkova ŭpłyvovym palitykam. Razam z tym, ciažka ŭjavić, što ijerarch pojdzie da Pucina prabivać pytańni pastavak traktaroŭ ci masła ź Biełarusi.

Tut chutčej stvaraŭsia pijaraŭski fon dla rasijskaj aŭdytoryi. Voś, hladzicie, my svaje, adzinaviercy, nie pradalisia, jak plavuzhajuć vorahi, Zachadu! Karaciej, va ŭlubionaj biełaruskim kiraŭnikom palitycy kivača pajšła prarasijskaja faza.

Pad viečar piatnicy stała zrazumieła, što jaho sustreča z patryjarcham, usie hetyja razvahi pra Biełaruś jak častku «śviatoj Rusi» — tolki «apieracyja prykryćcia».

Kulminacyja ž była ŭ Horkach. Miadźviedzieŭ zaprasiŭ hościa ŭ padmaskoŭnuju rezidencyju, kab bieź lišnich vušej pahutaryć pra spravy ziamnyja — ekanomiku dy hieapalityku. Kali jašče bolej kankretna — pra haz dy «Uschodniaje partniorstva».

Łukašenka pierad hetym pa ŭsich praviłach bajavoha mastactva zładziŭ artpadrychtoŭku. Spačatku sa Śvietłahorska abstralaŭ Maskvu paprokami, što nie puskaje našy tavary dy biazbožna dziare za haz. U čaćvier pretenzii byli pradublavany na sustrečy z hubiernataram Leninhradskaj vobłaści.

Pry hetym možna było zaŭvažyć, jak ubivaŭsia klin miž Miadźviedzievym i Pucinym: maŭlaŭ, dva prezidenty ŭ lutym na dziaržsaviecie damovilisia i pra haz, i pra inšaje — a tut chto-kolviek pačynaje ŭsio pierakručvać pa-svojmu.

I druhi momant — zvykłaja notka lohkaha šantažu: hladzicie, maŭlaŭ, i vokam nie mirhniecie, jak stracicie siniavokuju respubliku!

«Uschodniaje partniorstva» sapraŭdy torhaje Maskvu. Kaniečnie, aficyjnyja asoby nie mohuć publična skazać, kab Biełaruś tudy ni-ni. Ale maksimalna asłabić inicyjatyvu Brusiela rasijcy pastarajucca.

U tym liku i za košt ekanamičnych sastupak.

Mahčyma, Minsku dazvolać raspłačvacca za haz pa łahodnaj taksie 150 dołaraŭ, a nie pa 210, jak patrabavali dasiul. Zaŭvažcie, chvalonaja jeŭrapiejskaja formuła raźliku cany błakitnaha paliva pieratvaryłasia ŭ aniekdot. Usio adno prezidenty damaŭlajucca pa paniatkach.

Što ž da pratekcyjanizmu, to damaŭlajsia nie damaŭlajsia, jak prahučała ŭ Horkach, «trymać čynoŭnikaŭ u tonusie», ale kožny bok va ŭmovach kryzisu budzie padhulvać svaim vytvorcam. Tak što handlovyja mikravojny buduć uspychvać i nadalej.

Zatoje zamovu na budoŭlu AES Rasija voś-voś atrymaje. Łukašenka ćvierdzić, što heta stanie najvialikšym dasiahnieńniem jahonaj epochi. Ale avanturny, zatratny prajekt, zaviazany na Maskvu, na samaj spravie moža stać piatloj.

Nastupnyja niekalki tydniaŭ abiacajuć być intryhoŭnymi. Ci ułučać u paradak dnia Pałaty pytańnie pra kaŭkazskija respubliki? Potym: u Minsk prylataje emisar Jeŭraźviazu — češski ministr Švarcenbierh. U jaho dalikatnaja misija. Bo što da zaprašeńnia Łukašenki ŭ Prahu na samit «Uschodniaha partniorstva», to tut Jeŭropie nadta mułka.

Zrešty, u vypadku, kali ŭ Horkach toj paabiacaŭ Miadźviedzievu, što na samit ni nahoj, prablema moža cicha vyrašycca sama pa sabie pry zadavalnieńni ŭsich bakoŭ. Uklučna ź biełaruskaj apazicyjaj.

Chacia ŭvohule ad «Uschodniaha partniorstva» Łukašenka nie admovicca, kolki b ni zaklikali jaho źvieryć hadzińnik pa Maskvie. I

patryjarchavy słovy pra «adzinuju śviatuju Ruś» naŭrad ci tak užo hreli hościa ŭ minułuju piatnicu. Mo' navat śviarbieła jeretyčnaja dumka: kali «adzinaja», to čamu nie dajuć haz pa cenach smalenskaha pojasa?:)

Nu a kali za kožny skormleny vitamin Maskva patrabuje mnostva pasłuh — to i partnior budzie pacichu chitravać, hulać u svaju hulniu.

Darečy, u Horkach damoŭlena, što nastupnym razam Miadźviedzieŭ prylacić u Minsk. Chaj by źvieryŭ hadzińnik pa strełkach na ratušy :)

Miž inšym, choć hetaja budynina i navarob, ale ž nahadvaje, što jašče da epochi Rasijskaj impieryi biełaruskija harady mieli mahdeburhskaje prava naroŭni z haradami staroj Jeŭropy. Biez usialakaha «Uschodniaha partniorstva», zaŭvažcie :)

P.S. Viersija pra sastupki Maskvy paćviardžajecca. Praŭda, tolki adnym z bakoŭ. Na subotniku Łukašenka byŭ u humory. Dakłaŭ, što ŭ Horkach pašenciła pryniać «rašeńni na sotni miljonaŭ dołaraŭ». U pryvatnaści, Maskva nibyta zhadžajecca, kab Biełaruś płaciła za haz pa bolej łahodnym siaredniehadavym taryfie, atrymała šyrejšy vychad na rasijski rynak.

Ale ŭsio heta pakul što na ŭzroŭni abiacańniaŭ. Ź inšaha boku, biełaruski načalnik płacić toj samaj manietaj — abiacańniami nie siabravać z Zachadam na škodu Rasii. Maŭlaŭ, kali jaje kiraŭnictva tak pierajmajecca, treba «bolej uvažliva vyvučyć» dakumienty «Uschodniaha partniorstva». Jak bačym, Kreml sapraŭdy namahajecca raścierušyć inicyjatyvu Jeŭraźviazu.

• 0
• 0
• 0
• 0
• 0
• 0
• 0
• 0