Advakat Cichanoŭskaha pra jaho sustreču z Łukašenkam: Siarhiej paźbiahaje pociskaŭ ruki
Siarhiej Cichanoŭski sapraŭdy ŭdzielničaŭ u sustrečy z Alaksandram Łukašenkam 10 kastryčnika ŭ SIZA KDB. Na joj Łukašenka, daviedaŭšysia, što Siarhiej nie kantaktuje z žonkaj, dazvoliŭ patelefanavać joj. Telefonnaja razmova sa Śviatłanaj adbyłasia ŭ prysutnaści achovy. Pra heta Tut.by raspavioŭ jahony advakat Viktar Mackievič.
Jak raspavioŭ svajmu abaroncu Siarhiej Cichanoŭski, dla sustrečy ŭ SIZA KDB jaho ranicaj vyvieźli ź SIZA Žodzina, supravadžali jaho ludzi ŭ maskach. Pryvieźli ŭ Minsk u KDB, zaviali ŭ nievialikuju zału. Na stale ŭžo stajali tablički ź imionami źniavolenych: Babaryka, Znak, Salej, Šklaraŭ i inš., usiaho było 12 čałaviek, i dla ŭsich hetaje mierapryjemstva stała niečakanaściu.
— Uvajšoŭ Łukašenka i pačaŭ cisnuć usim ruki. Siarhiej paźbiahaje pociskaŭ ruki, aścierahajecca karanavirusu. Jon nie chacieŭ taksama, kab jaho zdymali na kamieru dla TB. Potym na praciahu piaci hadzin była razmova z Łukašenkam, dzie ŭ asnoŭnym pramaŭlaŭ jon sam.
Cichanoŭski ŭsio ž sprabavaŭ davieści svaju pazicyju, što jon znachodzicca pad vartaj pa nieabhruntavanych abvinavačvańniach, i, karystajučysia prysutnaściu pres-sakratara, aburyŭsia tym, što dziaržaŭnyja ŚMI raspaŭsiudžvajuć pra jaho niedakładnuju infarmacyju pra toje, što jon pracuje na RF, na zachad, pra jaho znajomstva sa Šklaravym i h.d. — raspaviadaje Viktar Mackievič.
Cichanoŭski taksama pytaŭsia, za što abviaścili ŭ vyšuk jahonuju žonku Śviatłanu Cichanoŭskuju, čamu niama na sustrečy Maryi Kaleśnikavaj.
Z adkazaŭ Łukašenki, jak skazaŭ Cichanoŭski, jamu stała jasna, što toj dobra abaznany ŭ chodzie rasśledavańnia kryminalnych spraŭ i ŭ tym, u jaki momant jakija ŭmovy ŭtrymańnia i čamu byli ŭ Siarhieja ŭ SIZA. Vykazvalisia taksama supraćlehłyja punkty hledžańnia z nahody taho, ci pavinien udzieł u palitycy ŭpłyvać na kryminalnyja abvinavačvańni.
Cichanoŭskamu dali zrazumieć, što jaho vypuściać z-pad varty nie chutka. U toj ža čas prahučała, što los źniavolenych buduć vyrašać śledstva i sud, i ŭsio pad kantrolem.
— Jak rastłumačyŭ moj padabaronny, pry razmovie pra kanstytucyjnuju reformu jon, Cichanoŭski, skazaŭ, što jon i tyja z prysutnych, chto zacikaŭleny, hatovyja i mahli b vykazać svaje prapanovy, ale nie ŭ kajdankach, znachodziačysia ŭ turmie, a pa dobraj voli, — raspavioŭ Mackievič.
Kamientary