21-hadovaj dziaŭčynie, što napisała «Žyvie Biełaruś» i namalavała bieł-čyrvona-bieły ściah, dali dva miesiacy aryštu

Sud Leninskaha rajona Minska pakaraŭ 21-hadovuju Maryju Safonavu za nadpis «Žyvie Biełaruś» i vyjavu BČB-ściaha na domie pa vulicy Bałtyjskaj i tratuarnaj darožcy pavodle art. 341 Kryminalnaha kodeksa dvuma miesiacami aryštu. Mienavita takoje pakarańnie prasiła dziaržabvinavaŭca Julija Daŭhała. Heta amal maksimalnaje pakarańnie pa hetym artykule, piša spring96.org.

Pavodle abvinavačvańnia Maryja «7 kastryčnika ŭ pieryjad z 1-j da 2-j hadziny nočy, dziejničajučy ŭ hrupie asob pa papiaredniaj zmovie, pamiž damami 2 i 4 pa vulicy Bałtyjskaj učyniła cyničnyja nadpisy i ździejśniła apahańvańnie budynka, dźviarej u sklep i parenčaŭ, tratuarnaj darožki i skryni dla śmiećcia».

Svaim nadpisam «Žyvie Biełaruś», na dumku abvinavačvańnia, Maryja «źniziła estetyčnyja prykmiety nazvanych abjektaŭ, čym pryčyniła škodu Remaŭtadoru na 442 rubli, ŽKH — na 61 rubiel i Minharśviatłu — na 53 rubli».

Ahulny pamier škody skłaŭ 556 rubloŭ. U materyjałach spravy — pakazańni śviedak, zapisy videakamier, pratakoły ahladu.

Maryja pryznała vinu častkova. Jana paćvierdziła ŭ sudovym pasiadžeńni, što ździejśniła dva nadpisy: «Žyvie Biełaruś» na asfalcie i BČB-ściaha na mietaličnych dźviarach kala doma №4 pa vulicy Bałtyjskaj. Dziaŭčyna skazała, što naniesła nadpis, tamu što jana biełaruska i chacieła takim čynam padkreślić svaju hramadzianskuju pazicyju i svaju nacyjanalnaść. Maryja zajaviła, što chacieła vykazać svaju pazicyju ab tym, što tut žyvuć biełarusy.

Jak patłumačyła Maryja, rašeńnie nanieści nadpisy ŭ jaje ŭźnikła paśla taho, jak 5 kastryčnika na vulicy Bałtyjskaj hrupa asob pad achovaj AMAPa z pompavaj strelbaj rabiła nadpisy na transfarmatarnaj budcy «Za Biełaruś».

U svaju čarhu advakatka Maryi Inesa Alenskaja pradastaviła ŭ sudzie zaklučeńnie śpiecyjalistaŭ ab tym, što nadpis «Žyvie Biełaruś» adnosicca da niejtralnych i nie źjaŭlajecca abraźlivym.

Taksama abaronca pradastaviła zaklučeńnie Instytuta historyi Akademii navuk ab tym, što BČB-ściah demanstruje kolery histaryčnaha ściaha, naniasieńnie jaho vyjavy demanstruje nacyjanalny honar. Abarona chadajničała ab tym, kab vyklikać u sud śpiecyjalista, jaki b zmoh patłumačyć adsutnaść u nadpisy «Žyvie Biełaruś» i naniasieńni BČB-ściaha prykmiet apahanieńnia. Ale sudździa Šut admoviłasia zadavolić hetaje chadajnictva.

Na sudzie taksama było pryviedziena zaklučeńnie zahadčyka adździeła hienieałohii hieraldyki i numizmatyki Instytuta historyi Nacyjanalnaj akademii navuk Alaksieja Šałandy pra BČB-ściah:

«Heta nacyjanalny simvał biełaruskaha naroda, jaki dvojčy mieŭ dziaržaŭny status u Biełaruskaj Narodnaj Respublicy 1918-1921 hadach i 1991-1995 hadach. Nacyjanalnaja simvolika zaklikanaja abjadnoŭvać nacyju ŭ baraćbie za dziaržaŭnaje samavyznačeńnie, niezaležnaść i suvierenitet. Vykarystańnie nacyjanalnych bieł-čyrvona-biełaha koleraŭ nie moža nanieści jakuju-niebudź škodu hramadskamu paradku, nie kažučy ŭžo pra maralny bok pytańnia».

Dziaržaŭnaja abvinavaŭca Julija Daŭhała nastojvaje, što Maryja Safonava dziejničała pa papiaredniaj zmovie ŭ składzie hrupy asob z vaśmi čałaviek. Chacia na łavie padsudnych znachodziłasia tolki adna Maryja Safonava. Prakurorka paprasiła sud pakarać Maryju pavodle artykuła 341 Kryminalnaha kodeksa aryštam na 2 miesiacy. Heta amal maksimalnaje pakarańnie pa hetym artykule.

• 0
• 0
• 0
• 0
• 0
• 0
• 0
• 0