«Noč muziejaŭ»: što, dzie, kali ŭ Biełarusi i susiednich krainach

«Noč muziejaŭ» – štohadovaje śviata, prytarnavanaje da Mižnarodnaha dnia muziejaŭ. Hety fest u apošnija hady nabyŭ sapraŭdy ŭsiejeŭrapiejski razmach: u 40 krainach hetymi dniami (a, dakładniej, načami) svaje dźviery naviednikam haścinna adčyniajuć bolš za 3 tysiačy muziejaŭ.

Sioleta u Biełarusi «Noč muziejeŭ» śviatkujuć jak nikoli šyroka: akramia tradycyjnych ekskursijaŭ pa muziejnych załach, hetym razam naviednikam prapanujucca taksama mastackija i teatralizavanyja imprezy, jakija projduć nie tolki ŭ staličnych muziejach.

Takim čynam, «Noč muziejaŭ» u Biełarusi:

Homiel. Hamielčukam 17 maja nadorycca mahčymaść načnoha špacyru siarod ekspanataŭ Pałacu Rumiancavych i Paskievičaŭ. Jak paviedamlaje sajt Homielskaha pałacova‑parkavaha ansamblu, u miežach kulturnaj akcyi płanujucca tradycyjnyja ekskursii, viečar‑pryjom u styli śvietskich raŭtaŭ kanca XVIII — pačatku XIX stst., a taksama kancierty kłasičnaj muzyki, homielskich bardaŭ i vystup teatra mody. Asnoŭnyja imprezy adbuducca na pandusie pałaca i ŭ parku la fantana.

Hrodna. U horadzie nad Niomnam adbudziecca nie tolki Noč Muziejaŭ, ale i Dzień. Takim čynam, dzionnaja prahramma (17 maja):

•11.00 Novy zamak — Vystup kłuba słavianskich adzinaborstvaŭ «Arydan».

•13.00 Novyj zamok — kancert navučencaŭ kaledža mastactvaŭ

•z 13.00 u Starym zamku ładzicca majstar‑kłasa hrodzienskich łučnikaŭ i adbudziecca vystup kłuba histaryčnaj rekanstrukcyi «Haradzienski dvuzub»

•16.00 Stary zamak – «Muzyka siaredniaviečnych dudaroŭ» u vykanańni hurta »Minnentahl».

Na imprezy dzionnaj prahramy uvachod volny.

Viečarovaja prahrama (Novy zamak):

•20.30 Prezientacyja ŭnikalnaha ekspanata «śviedka apošniaha sojma Rečy Paspalitaj», prezientacyja knihi «Padarožža pa Paniamońni».

•21.00 Ekskursija pa muziei

•21.30 «Isus Chrystos – supierzorka» – muzykalnaja kampazicyja pavodle Viebiera i Rajsa na prystupkach zamka.

Bilet na viečarovuju prahramu kaštuje10 000 rubloŭ.

Viciebsk. 18 maja Viciebski centr sučasnaha mastactva prezientuje art‑prajekt «Muzykalna‑cyrkavyja fantazii ad Marka i Kazimira», Siarod udzielnikaŭ akcyi – artysty «Nievierahodna dziŭnaha cyrka», viciebskija mastaki, himnasty spartovaha kłuba, studyja «Move‑art», niefarmalnyja muzyčnaja hrupy «Ałmaznyj front», «SouthBand» i «TheGarretcoverband» . U Muzyčnaj haścioŭni (pr‑kt Frunze, 11) adčynicca vystava fatahrafii «Palot čullivaści. Erotyka ŭ cyrku». Na placoŭkach la vystavačnaj zali ŭ muzyčnym azdableńni adbudziecca svatareńnie mastackich pałotnaŭ, a taksama pakažuć filmy pra tvorčuju spadčynu Marka Šahała, Kazimira Maleviča i El Lisickaha. Imprezy pačnucca ŭ 20.30 i praciahnucca da 24.00.

Mahiloŭ. 16 maja vas zaprašaje Mahiloŭski abłasny krajaznaŭčy muziej imia Ramanava i muziej etnahrafii:pachadzić pa muziejnych załach, atrymać asałodu ad instrumientalnaj muzyki i narodnych śpievaŭ, a taksama adviedać kirmaš suvieniraŭ.

Połacak. Pałačanie sustrenuć «Noč Muziejaŭ» upieršyniu. 16 maja buduć adčynieny 11 muziejaŭ historyka‑kulturnaha zapaviednika. Uvachod‑volny. U Safijskim sabory – načny kancert kłasičnaj muzyki, u mastackaj halerei – pierfomans «Stvareńnie śvietłavoha šedeŭru», u krajaznaŭčym muziei – kinaseans na volnym pavietry, u pryrodna‑ekałahičnym – kancert rok‑hurta INDRA.

Miensk. U litaraturnym muziei Janki Kupały (Miensk, vuł. Ja. Kupały, 4) «Noč muziejaŭ» pačniecca 16 maja a 18 hadzinie z prezietnacyi karciny mastaka V. Niamcova «Partret maładoj maci Janki Kupały Bianihny Vałasievič». Potym:

19.00 — Impreza «Kupałavym haścincam». Prezientacyja filijałaŭ Dziaržaŭnaha litaraturnaha muzieja Janki Kupały ŭ supravadžeńni etna‑hurta «Vietach».

20.00 — Folk prahrama «Dzivasił».

21.00 — Viečar sučasnaj biełaruskaj paezii «Paetyčnyja Akvarydy» (Akvarydy — mietearytny patok, jaki lacić u traŭni z suzorja Vadalivu). Siarod vystupoŭcaŭ — maładyja piśmieńniki z supołki «Litaraturnaje pradmieście» pad kiraŭnictvam Ł.Rubleŭskaj.

22.00 — «Akustyka muziejnaj cišyni» (vystupleńnie litaraturna muzyčnych hurtoŭ «Bosaje sonca», «Žaba ŭ kalainie»).

Mastacki muziej 16 maja zaprašaje naviedać imprezu «Uschodniaja noč», u ramkach jakoj adbudziecca adkryćcio 3 vystavaŭ: «Ludzi Jehipta» fotamastaka Vadzima Kačana, «Schavanaja Japonija» majstra hrafiki Jachahi Kidziura, a taksama vystava rarytetnych źlepkaŭ staražytnajehipieckich skulpturaŭ. Aproč ekspazicyjaŭ – teatralna‑mastackaje pradstaŭleńnie «Kalejdaskop uschodnich mrojaŭ». Naviedniki, jakija pryjduć u mastacki muziej u tradycyjnych kolerach Uschodu: čyrvonym abo załatym – atrymajuć prava na volny ŭvachod.

U litaraturnym muziei Jakuba Kołasa adbuducca ekskursijny majstar‑kłas «Łandšaftnyja siadziby Minska» na prykładzie majontkaŭ biełaruskich šlachieckich rodaŭ Huten‑Čapskich i Prušynskich, a taksama adbudziecca vystava ahrasiadzibaŭ Minskaj vobłaści na volnym pavietry. Da taho ž, u prahramie śviata: načnaja ekskursija pa minskich adrasach Jakuba Kołasa, fotasiesija pobač z paetavym aŭtamabilem «Pobieda», sceny sa śpiektaklaŭ pavodle tvoraŭ Kołasa, a taksama litaraturny viečar, pryśviečany pierakładam paemy «Novaja ziamla» na jeŭrapiejskija movy.

A jak buduć śviatkavać «Noč Muziejaŭ» našyja susiedzi? U Sankt‑Pieciarburzie arhanizatary najpierš paciešać naładžanaściu śviata: da 6‑aj ranicy buduć pracavać 40 muziejaŭ i pamiž imi budzie chadzić darmavy aŭtobus. U bolšaść picierskich muziejaŭ možna budzie trapić pa adzinym kvitku, jaki budzie kaštavać 250 ras. rubloŭ (kala 22 tys. br). Litva: u stalicy tamtejšych pivavaraŭ – Biržach, arhanizatary «Nočy Mietała» zaprašajuć na viečar mistyki i mahii ličbaŭ u były zamak Radziviłaŭ. Noč Muziejaŭ u Varšavie pačniecca viečarovym paradam tancoŭščykaŭ i žanhloraŭ, jakija projduć ad Krakaŭskaha Pradmieścia da Zamkavaha Placu.

• 0
• 0
• 0
• 0
• 0
• 0
• 0
• 0