Barščeŭski rychtuje ŭ pierajemniki Ivaškieviča?

Kiraŭnik Partyi BNF Lavon Barščeŭski choča bačyć u jakaści svajho pierajemnika namieśnika staršyni Viktara Ivaškieviča. Zaraz iduć aktyŭnyja pieramovy na hety kont. Razam z tym niekatoryja inšyja pradstaŭniki Upravy mohuć pazbavicca svaich pasad.

Jak stała viadoma «Salidarnaści», prapanovu padtrymać Viktara Ivaškieviča ŭ jakaści novaha kiraŭnika partyi Lavon Barščeŭski ahučyŭ na abłasnym schodzie ŭ Hrodnie.

Praŭda, aficyjnaj zajavy na hety kont staršynia rabić pakul nie biarecca, chacia i nie admaŭlaje, što ličyć Ivaškieviča dobrym pierajemnikam.

— Ja jašče nie atrymaŭ ad Ivaškieviča piersanalnaj zhody, tamu nie mahu kamientavać. Pakul viaducca pieramovy, — zajaviŭ «Salidarnaści» Lavon Barščeŭski. — Skažu tolki, što Viktar — heta adziny čałaviek, jaki ciahnie arhanizacyjnuju rabotu ŭ Froncie. Bieź pierapynkaŭ, biez adpačynkaŭ. I jon byŭ by dobrym u jakaści pierajemnika. Ja pa pracy baču, chto pracuje, a chto tolki havoryć. Dla mianie heta absalutna vidavočna.

Sam Viktar Ivaškievič taksama zajaŭlaje, što nie pryniaŭ jašče kančatkovaha rašeńnia.

— Jość roznyja varyjanty, jakija zaraz abmiarkoŭvajucca. Kali ja pajdu na staršyniu, ja sam pra heta abviašču, jak było ŭ minuły raz, — paviedamiŭ «Salidarnaści» Viktar Ivaškievič. — Heta źviazana nie z tym, što ja niešta chavaju, prosta zaraz idzie padlik varyjantaŭ. Davajcie pačakajem schodu 20 červienia, kali mohuć być ahučany imiony kandydataŭ na pasadu kiraŭnika. Moj namier vyłučacca budzie zaležyć ad toj padtrymki, jakaja budzie mnie akazana frontaŭcami, ad taho, nakolki heta treba ludziam. Bo mnie asabista piersanalnaj vyhody ad pasady staršyni niama nijakaj, akramia ciažaru i hałaŭnoha bolu. Adnak u mianie jość pačućcio abaviazku pierad partyjaj i razumieńnie peŭnaj misii. Ale kali ja i budu vykonvać rolu słuhi BNF na dadzienaj pasadzie, to pavinien viedać, nakolki ja zapatrabavany. Biez analizu hetaj padtrymki rabić zajavy pra pretenzii na niejkija pasady, liču niesvoječasovym.

Nahadajem, što Viktar Ivaškievič užo pretendavaŭ na staršynstva ŭ 2007 hodzie.

Na źjeździe ŭ śniežni jon zdoleŭ nabrać usiaho 26 hałasoŭ, u toj čas jak jahonyja kankurenty Aleś Michalevič i tahačasny staršynia Vincuk Viačorka atrymali bolš za sto hałasoŭ, faktyčna padzialiŭšy partyju napałovu. Kab praduchilić raskoł, było pryniataje rašeńnie prapanavać alternatyŭnuju fihuru, u vyniku čaho staršynioj partyi staŭ Lavon Barščeŭski. Nakolki zaraz Viktar Ivaškievič zdoleje atrymać padtrymku ŭ siabroŭ BNF, stanie viadoma 20 červienia.

Razam z tym u partyi chodziać razmovy pra toje, što inšyja jaje siabry mohuć pazbavicca svaich pasad. U

pryvatnaści, heta datyčyć namieśnika staršyni Jurasia Hubareviča i adkaznaha sakratara partyi Uładzimira Łabkoviča. Pavodle krynic u partyi, u chutkim časie moža navat paŭstać pytańnie pra ich vyklučeńnie.

— My nikoha nie vyklučajem, — zapeŭniŭ «Salidarnaść» Lavon Barščeŭski. — Adzinaje, što my prosim ad ich — dać spravazdaču svajoj dziejnaści na Sojmie 20 červienia. Kali im nie budzie pra što havaryć, tady Sojm i budzie vyrašać. Kali Sojm skaža, što jany ničoha nie rabili, hetaje pytańnie moža ŭźniknuć.

Miž tym pavodle Jurasia Hubareviča, pytańnie ź jaho vyklučeńniem ŭžo daŭno visić ŭ pavietry.

— Siońniašniaje kiraŭnictva sprabuje pazbavicca ad inšadumcaŭ, — adznačaje Hubarevič. — Barščeŭski spryjaŭ raskołu partyi ŭ 1999‑m. Zaraz jon choča raskałoć jaje druhi raz. Dla Barščeŭskaha źviadzieńnie partyi da isnavańnia ŭ vyhladzie piačatki i statuta bolš prymalna, čym prychod novych ludziej u kiraŭnictva. Pra heta śviedčać jaho siońniašnija dziejańni, jakija iduć u razrez z rašeńniami kirujučych orhanaŭ. Na žal, tak stałasia, što svaje palityčnyja niaŭdačy Barščeŭski i jaho kamanda pryzvyčailisia śpisvać na «kryvavy režym» i ŭnutrypartyjnych vorahaŭ.

Anastasija Zielankova, Salidarnaść

• 0
• 0
• 0
• 0
• 0
• 0
• 0
• 0