Niebiaśpiečny kryzis na Bałkanach: jašče adna mahčymaść novaj vajny

Na minułym tydni śpiecpradstaŭnik ES u Bośnii Kryścijan Šmit papiaredziŭ, što mirnaje pahadnieńnie, jakoje pałažyła kaniec Baśnijskaj vajnie 1995 hoda, znachodzicca pad pahrozaj zryvu. Pryčyna hetaha — aktyvizacyja sierbskich sieparatystaŭ u Bośnii, piša CNN.

Reč u tym, što paśla vajny kraina była padzielenaja na dva aŭtanomnyja rehijony — Fiederacyju Bośniju i Hiercehavinu i Respubliku Sierbsku. Kiraŭnik Respubliki Sierbskaj Miłarad Dodzik na praciahu doŭhaha času nieadnarazova pahražaŭ adździalić Respubliku ad astatniaj Bośnii. Ciapier jon vyrašyŭ pakazać svaju surjoznaść i ŭvieści zakony, što daduć baśnijskim sierbam mahčymaść sfarmiravać ułasnuju armiju i sudovuju sistemu.

Šmit miarkuje, što, kali inicyjatyva Dodzika spraŭdzicca, heta budzie raŭnaznačna adździaleńniu Respubliki Sierbskaj. Paru dziesiacihodździaŭ tamu napružvańnie pamiž roznymi baśnijskimi nacyjami — sierbami, charvatami i baśniakami — pryviało da vajennych złačynstvaŭ. Voś čamu ciapier aktyvizacyja sieparatysckich nastrojaŭ u Bośnii tak chvaluje naziralnikaŭ.

Člen brytanskaj pałaty Łordaŭ Arminka Chielič, što naradziłasia ŭ Bośnii, tłumačyć: «Hramadzianie va ŭsioj Bośnii i Hiercehavinie, u tym liku i ŭ Respublicy Sierbskaj, bajacca hvałtu. Vierahodna, što dalejšy ruch u bok adździaleńnia vyklikaje reakcyju. Niemahčyma, kab raspad Bośnii i Hiercehaviny prajšoŭ mirna».

Palitołah i aŭtar knihi «Hoład i lutaść: demakratyja na Bałkanach» Jaśmin Mujanovič raspavioŭ pra mižnarodnyja nastupstvy mahčymaha kanfliktu. Zhodna ź im, taki kanflikt stanie katastrofaj dla ES i NATA, bo heta budzie jašče adzin kryzis u halinie biaśpieki ŭ Paŭdniova-Uschodniaj Jeŭropie, dzie abstanoŭka i tak niestabilnaja. Mujanovič nahadvaje, što anałahičnyja kryzisy ŭžo majuć miesca va Ukrainie, Biełarusi, Siryi i Afhanistanie, tamu ni ES, ni ZŠA nie mohuć sabie dazvolić niestabilnaść u Bośnii.

Što možna zrabić, kab spynić kryzis?

Kali kazać pra NATA, aljans maje mahčymaść dziejničać, u tym liku abaraniać mir u Bośnii, tolki pa zapycie krain-čalcoŭ aljansu. I pakul što niama nijakich prykmiet, što čalcy NATA ŭ chutkim časie pažadajuć pierajści da bolš aktyŭnych dziejańniaŭ, čym prosta vykazvańni zakłapočanaści. Što datyčycca Rady biaśpieki AAN, jana nie moža aktyŭna spryjać vyrašeńniu kryzisu biez zhody Rasii.

Vysokapastaŭleny čynoŭnik ES patłumačyŭ u razmovie z CNN, što siarod niekatorych krain-čalcoŭ sajuza jość žadańnie paŭdzielničać u vyrašeńni kryzisu. Ale ž kab prymać hłabalnyja rašeńni na ŭzroŭni ES, patrebnaja zhoda ŭsich krain, što ŭvachodziać u sajuz, a damahčysia hetaha ciažka. Adnak čalcy ES mohuć uvieści adnabakovyja sankcyi suprać Miłarada Dodzika i inšych sierbskich sieparatystaŭ.

• 0
• 0
• 0
• 0
• 0
• 0
• 0
• 0