Vieniedziktaŭ: Adnaŭleńnie impieryi. U 14-m hodzie heta byŭ Krym, a ŭ 23-24 hodzie heta budzie sajuz Rasii i Biełarusi
Hałoŭny redaktar radyjostancyi «Echo Moskvy» ŭ efiry raspavioŭ, što, ź jaho punktu hledžańnia, staić za padpisańniem Pucinym i Łukašenkam intehracyjnych prahram.
Pavodle žurnalista, viadomaha svaimi ciesnymi kantaktami z Kramlom, intehracyjnaja historyja zaklučajecca ŭ tym, što pierad praciaham paŭnamoctvaŭ Uładzimiru Pucinu treba «vyklikać zachapleńnie i ščaście» ŭ rasijan, jak jon vyklikaŭ zachapleńnie i ščaście, dałučyŭšy Krym.
«I hetaje zachapleńnie i ščaście aznačaje abjadnańnie ź Biełaruśsiu», ‒ havoryć Vieniedziktaŭ.
«Adnaŭleńnie impieryi. U 14-m hodzie heta byŭ Krym, a ŭ 23-24 hodzie heta budzie sajuz Rasii i Biełarusi, z adzinym usim, adzinym prezidentam, adzinaj valutaj, adzinym hazavym rynkam. I hetak dalej. Ułasna kažučy, usio, što jon [Pucin] zaraz robić u adnosinach da Minska, ja b nazvaŭ słovam «padkradajemsia».
Pavodle Vieniedziktava, «lichim kavaleryjskim naskokam u śniežni 2019 — studzieni 2020 hoda nie ŭdałosia «šuhanuć» biełaruskaje kiraŭnictva».
Vieniedziktaŭ zhadaŭ niaŭdały vopyt byłoha pasła Rasii ŭ Biełarusi Michaiła Babiča.
«Čałaviek hienieralskaj formy, jaki pačaŭ, u tym liku, jak mnie raskazvali, u ambasadzie pravodziŭ sustrečy z kamandujučymi biełaruskimi akruhami, vajskoŭcami. To-bok jon hetuju samuju vajennuju elitu, mahčyma, i śpiecsłužbisckuju elitu, karmiŭ, paiŭ i pryvablivaŭ».
Tady Łukašenka zapatrabavaŭ ad Pucina zabrać ambasadara. «Heta značyć kavaleryjski naskok nie atrymaŭsia».
Ale praz «padziei žniŭnia 2020 hoda, prezidenckija vybary ŭ Biełarusi, nastupnyja padziei, pierš za ŭsio, supraciŭleńnie značnaj častki biełaruskaha naroda vynikam vybaraŭ, pryviało da taho, što Łukašenka ŭnutry asłabieŭ.
Ale da hetaha času RF užo inakš hladzieła na inkarparavańnie Biełarusi — albo ŭ skład, albo ŭ ahulnuju dziaržavu. Nasamreč, nie maje značeńnia. Źbirajem impieryju. I tamu budziem padkradvacca», — havoryć Vieniedziktaŭ.
Vieniedziktaŭ taksama raskazaŭ pra kramloŭski recept anšlusu:
«Nie rasijskaje nasielnictva kuplać, a biełaruskaje nasielnictva kuplać. Nu i biełaruskuju elitu, zrazumieła. Kiraŭnictva vojska, kiraŭnictva śpiecsłužbaŭ. Heta značyć voś hetyja słupy, na jakija abapirajecca zaraz Alaksandr Łukašenka.
Tamu ja dumaju, što adnym z hetych sšytkaŭ, jakija Łukašenka vymušany byŭ padpisać, — heta pahłybleńnie vajennaha supracoŭnictva. Ciapier pojduć sumiesnyja vučeńni, navučańnie ŭ Hienštabie Rasijskaj akademii i Hienštabie RF maładych biełaruskich aficeraŭ. Raźmiaščeńnie našych i hetak dalej. I voś heta adna z tych «darožnych kart», na jakuju ja źviarnuŭ asobnuju ŭvahu».
Vieniedziktaŭ padkreślivaje, što resursaŭ u Pucina, kab nacisnuć na Łukašenku, zaraz šmat bolš, čym było da žniŭnia 2020 hoda.
Kamientary