Čałaviek z sercam śvińni. Pacyjentu ŭ ZŠA ŭpieršyniu ŭ śviecie pierasadzili serca žyvioły
Amierykanskija chirurhi praviali pieršuju ŭ śviecie ekśpierymientalnuju apieracyju, padčas jakoj pierasadzili pacyjentu hienietyčna madyfikavanaje serca śvińni. Daktary kažuć, što heta adziny šaniec Devida Bienieta na vyžyvańnie — bieź pierasadki jaho čakała b nieminučaja śmierć.
Pa słovach chirurhaŭ, apieracyju, jakaja doŭžyłasia siem hadzin, zrabili Bienietu try dni tamu, i ciapier jaho stan zastajecca dobrym, piša Bi-bi-si.
«Dla mianie vybar byŭ pamiž śmierciu i hetaj pierasadkaj, — skazaŭ 57-hadovy Bieniet napiaredadni apieracyi. — Ja razumieju, što dalejšy moj los zusim nieviadomy, ale dla mianie heta apošni šaniec».
Śpiecyjalisty ź Miedycynskaha centra ŭniviersiteta Merylenda atrymali ad uładaŭ śpiecyjalny dazvoł na apieracyju. Jany patłumačyli, što bieź jaje pacyjent pamre.
Ci ŭviančajecca pierasadka pośpiecham, da hetaha času kančatkova niezrazumieła.
Dla chirurhaŭ apieracyja stała vynikam šmathadovych daśledavańniaŭ. Jany spadziajucca, što ich pośpiech dapamoža vyratavańniu žyćciaŭ mnohich ludziej pa ŭsim śviecie. U svajoj zajavie Univiersitet Merylenda cytuje chirurha Bartli Hryfita, pa słovach jakoha apieracyja zaklikanaja «nablizić rašeńnie kryzisu ź niedachopam donarskich orhanaŭ».
Pa danych sajta OrganDonor.gov tolki ŭ ZŠA pierasadki donarskich orhanaŭ čakajuć kala 100 tysiač ludziej, i 17 pacyjentaŭ u dzień pamirajuć z-za ich niedachopu.
Kamientary