Čuma XXI stahodździa

Heta robiać načalniki. Heta robiać kiraŭniki siaredniaha złučva. Nie adstajuć ad ich kansultanty dy ich sakratarki. Robiać heta i prostyja słužboŭcy. Imia zaniatku — karystańnie dadatkovymi funkcyjami mabilnika padčas pracy.

Kolki hod tamu ŭbudavanym u mabilnik Internietam i mesendžerami biezupynku karystalisia adno słužačyja investycyjnych fondaŭ i biržaviki. Ciapier ža - heta ahulny nabytak, kali pošaść pratačyłasia navat u vysokija amerykanskija ofisy.

«Kali ŭ čas pasiadžeńnia niechta pramaŭlaje abo robić prezientacyju, dyk dziaržsłužboŭcy moŭčki nachilajucca nad stałom: ale ž nie dla malitvy, - kaža Filip Rajs, adzin z hałoŭnych daradcaŭ dziaržsakratarki Chiłary Klintan. — Šmat u jakich dziaržaŭnych ustanovach karystańnie sotavikami zabaroniena, i ludzi siak-tak pilnujucca paradka, ale tam, dzie toje dazvolena, dyk mabilny razhuł pieraŭzychodzić usiakija razumnyja miežy».

Zvyčka listavacca pa mabilniku padčas pracy daŭno pierasiahnuła ŭzrostavyja ramki.

Naprykład, 47-hadovamu Malkalmu A. Śmitu, staršyni parłamienckaj bolšaści ŭ sienacie štatu Ńju-Jork, jaki byŭ zaśpiety za čytańniem esemesaŭ padčas važnaj sustrečy z mahnatami, pahražaje inicyjavanaje paplečnikami pa partyi źmiaščeńnie z pasady.

Šmatfunkcyjanalnyja mabilniki zrabilisia nieadjemnaj častkaj tualetu načalnikaŭ i biznesoŭcaŭ, jakija padčas pasiedžańniaŭ i pieramovaŭ nie mohuć strymacca, kab nie pahladzieć elektronnuju poštu, abo kab nie pacikavicca, što novaha na ich rachunkach u Facebook'u abo Twitter'y.

Hetyja źmianieńni ŭ pavodzinach spravavych ludziej spryčynilisia da haračaj dyskusii, u jakoj kansiervatyŭna nastrojeny bok upeŭnieny, što karystańnie prasunutymi aj-podami i «BłekBiery» na pasiedžańniach śviedčyć pra paharšeńnie dziełavoj marali i ŭ dadatak adciahvaje ŭvahu ad surjoznych spravaŭ. Prychilniki novych technałohij naadvarot: ličać, što ŭ śviecie, dzie treba «kab praca było zroblena ŭžo ŭčora», ihnaravańnie novych paviedamleńniaŭ i esemesaŭ — niedaravalnaja raskoša i navat praŭdzivaja niebiaśpieka dla biznesu.

Hołas «suprać»: Ruki na stoł!

Ciapierašni rabotnik užo nie adčuvaje, kali možna, a kali — nie karystacca mabilnikam. Spakusa pahladzieć naviny abo pravieryć elektronnuju paštovuju skryniu ściraje miežy pamiž pryvatnym i pracoŭnym časam. Prykładam tamu - niadaŭni vypadak u štacie Techas, kali adzin vypusknik VNU nie atrymaŭ pracu praz svajo zbytkoŭnaje karystańnie mabilnikam. Kali padčas sumoŭja jamu dazvolili zazirnuć u Sieciva, kab jon zdoleŭ znajści adkaz na pytańnie, jakoje zadaŭ intervjuer, to vypusknik, adšukaŭšy adkaz, nie zmoh pieradoleć spakusy i paśla pahladzieŭ elektronny list ad siabra.

Ludzi, jakija karystajucca mabilnikami ŭ čas pracoŭnych naradaŭ jak by stvarajuć paralelnaje pasiedžańnie: častka aktyŭna esemesicca mižsobku na pryvatnyja temy, častka nie zvažajučy na paradak dnia abmiarkoŭvaje i kpić z taho što adbyvajecca ŭ pakoi.

Ci varta kazać, što heta škodzić pracoŭnamu pracesu. Mała taho - pracoŭniki pačynajuć chłusić. Niašmat chto ź ich pryznajecca, što dasyłaje paviedamleńnie siabru abo što stroić kpiny z načalnika, - bolšaść kaža, što juzaje mabilnik z dobrymi metami: šukaje ŭ Siecivie adkazy na pytańni, jakija paŭstajuć na pasiedžańni, abo prosta zanatoŭvaje ŭ mabilnik vystup.

«Kampanii pakul nie vypracavali adzinuju palityku ŭ dačynieńni da srodkaŭ mabilnaje suviazi, — kaža Nensi Felin, kiraŭnica kansultacyjnaj kampanii ePolicy z Ahajo.

Šmat chto z kiraŭnikoŭ pamylajecca, kali ličyć, što esemesy adciahvajuć uvahu mienš čym razmovy.

Kali pracaŭnik u prysutnaści inšych lapaje pa kłavijatury mabilnika, heta pieraškadžaje ŭ toj ža miery, jak i zvyčajnaja bałbatnia».

Hołas «za»: mabilnaja zbroja

Ale za ciapierašnim śvietam biznes bankrutuje i zaniepadaje (ci naadvarot kvitnieje) adno dziakujučy chutkaści reakcyi na źmienlivaść rynku. Tamu, nasupierak piarečańniu z boku šanavalniki čyścini biźnies-kodeksa, šali u spravie mabilnaj pošaści , zdajecca, chilacca na karyść prychilnikaŭ biazdrotavych dačynieńniaŭ padčas pracy.

«Klijenty i partniory pa biznesie pierakananyja, što ty pavinny być u zonie dasiahnieńnia 24 hadziny na dzień, 7 dzion na tydzień, a biznesoŭcy, jakija ličuć, što heta nie tak — adno stračvajuć»,

- kaža Dejvid Beretron, miedyjny daradca ź Sietła.

Pa-druhoje, biznesoŭcy musiać prystasoŭvacca da tych partnioraŭ, dla jakich mabilny zrabiŭsia ich płoćciu i kryvioj. «Pieršyja paŭhadziny našaj spravavoj sustrečy patencyjny klijent hulaŭsia sa svaim mabilnikam, — raspaviadaje Ronald Chobs, menedžer raspaŭsiudnaj kampanii na Manchetanie. - Adzin z nas navažyŭsia navat zazirnuć na ekran mabiłki — heta byli «honački». Potym klijent pačaŭ kazać svaje ŭmovy, nie adryvajučy pozirku ad ekrana. I choć takija maniery nas razdražniali, my usio ž dahamanili ź im da kanca — my nie žadali hublać prybytku, pakolki ŭmovy, prapanavanyja amataram mabiłki, byli vyhadnyja».

U dadatak, psichołahi ličać, što listavańnie pa mabilnikach miž kalehami hurtuje kalektyŭ, a bałbatnia ŭ čatach źnižaje škodnaje napružańnie i vyvalniaje pracoŭny patencyjał. «Žarty i kpiny padčas pasiedžańnia mohuć adno padvysić kreatyŭnaść supracoŭnika, — kaža Džoš Rabinovic, kiraŭnik rekłamnaha adździeła kampanii «Hrej». — My z kalehami časta abmieńvajemsia pa mabilnikach žartami, paviedamleńniami, pytańniami i novymi idejami, jakija nie možam vykazać uhołas, i raz-poraz hety zaniatak robicca vielmi karysnym dla pracy».

Naastatak, pryšpilny mabilnik, nabitkavany šmatlikimi funkcyjami - sprava imidžu. U šmat jakich prafiesijnych kołach, dzie treba biezupynku pakazvać moc i ŭładnaść, najaŭnaść takich pryboraŭ u ofisie robicca žyvoj demanstracyjaj statusu i pieravahi.

Heta ŭsio roŭna jak dastać chvacki pistalet u kaŭbojskim sałunie.

Kali ŭ čas pasiedžańnia słužboŭca kładzie pierad saboj šmatfunkcyjanalny aj-pod ci «Nokija» ( a to i dva razam) i navat pačynaje karystacca im — heta abvodny šlach skazać astatnim: «Ja - važny čałaviek. Ja duža zaniaty i kali hetaja sustreča nie zacikavić mianie praź niekalki chvilinaŭ, dyk ja budu rabić sotniu inšych rečaŭ pa svaim mabilniku».

• 0
• 0
• 0
• 0
• 0
• 0
• 0
• 0