Palitviazień Mikita Jemialjanaŭ užo 38 dzion u karcary, z 3 lutaha jon haładaje
Palitviazień Mikita Jemialjanaŭ, jaki adbyvaje pakarańnie ŭ mahiloŭskaj turmie, užo 38 dzion znachodzicca ŭ karcary. I treci tydzień jon haładaje.
8 lutaha svajaki pasłali jamu 50-kiłahramovuju pasyłku, jakuju administracyja kałonii nie zabirała dva tydni. Viadoma, što supracoŭniki mahiloŭskaj pošty nieadnarazova pasyłali ŭ kałoniju paviedamleńni z patrabavańniem zabrać jaje. Pa dadzienych sajta Biełpošty, pasyłka była dastaŭlena tolki 23 lutaha — praz 15 dzion paśla adpraŭki.
Da 23 lutaha Mikita byŭ źmieščany ŭ karcar, dzie znachodziŭsia 38 dzion zapar. Sa žniŭnia 2021 hoda heta piaty raz, kali palitviazień prysudžajecca da sutak u karcary.
U žniŭni—vieraśni minułaha hoda jon pravioŭ u karcary 42 dni, u kastryčniku-listapadzie — 30 sutak, u śniežni-studzieni — 13 sutak, a ciapier — jašče 38.
3 lutaha Mikita ŭ znak pratestu abviaściŭ suchuju haładoŭku. Z-za drennaha samaadčuvańnia jon pačaŭ pić vadu, ale haładoŭku nie spyniŭ. Pakul nieviadoma, ci haładaje jon jašče i ciapier, bo advakat pakul nie mieŭ mahčymaści naviedać Mikitu.
Anarchisty Mikita Jemialjanaŭ i Ivan Komar 12 lutaha minułaha hoda byli asudžanyja na 7 hadoŭ pazbaŭleńnia voli ŭ kałonii ŭzmocnienaha režymu kožny. Ich pryznali vinavatymi ŭ paškodžańni majomaści i niezakonnych dziejańniach z haručymi rečyvami ŭ hrupie pa papiaredniaj zmovie.
Havorka idzie pra dźvie akcyi: u budynak suda kinuli lampačku z farbaj, a ŭ budynak SIZA — butelku z zapalnaj sumieśsiu, jakaja ŭ vyniku nie zaharełasia. Abiedźvie akcyi byli źviazanyja z sudom nad anarchistam Dźmitryjem Palijenkam i byli pratestam suprać pieraśledu palitviaźniaŭ.
Paźniej sudovaja kalehija Minharsuda razhledzieła apielacyi i źmianiła prysud pa niekalkich častkach abvinavačvańnia. Vynikovaje pakarańnie vyznačana šlacham častkovaha składańnia: Jemieljanovu — 4 hady, a Komaru — 3,5 hady ŭzmocnienaha režymu. U studzieni Komar vyjšaŭ na svabodu pa ŭmoŭna-daterminovym.
27 studzienia Jemialjanava pačali sudzić pa artykule 411 KK RB («złosnaje niepadparadkavańnie patrabavańniam supracoŭnikaŭ papraŭčaj ustanovy»). Jamu pahražaje jašče dva hady pazbaŭleńnia voli.
Kamientary