Pra śmierć Jaŭhiena Białasina paviedamiŭ u svaim Fejsbuku hramadski dziejač z Bresta Ihar Baranoŭski.
«Sumnaja i zusim niečakanaja navina. Siońnia ŭviečary, 10 sakavika, u špitali, paśla ŭskładnieńniaŭ, vyklikanych karanavirusam, na 68 hodzie žyćcia pamior Jaŭhien Białasin — biełaruski hiermanist, pierakładčyk, žurnalist i hramadski dziejač ź Bieraścia», — napisaŭ Baranoŭski.
Jaŭhien Białasin naradziŭsia 9 červienia 1954 hoda ŭ vioscy Hryniavičy Śvisłackaha rajona Hrodzienskaj vobłaści. Skončyŭ Mienski instytut zamiežnych moŭ.
20 hadoŭ, da palityčna matyvavanaha zvalnieńnia ŭ 2001 hodzie, adpracavaŭ u Bresckim dziaržaŭnym univiersitecie vykładčykam niamieckaj movy i inšych hiermanisckich kursaŭ. Paśla pracavaŭ jak pierakładčyk i žurnalist.
Z kanca 1980-ch hadoŭ Jaŭhien Białasin byŭ aktyvistam adradženckaha i demakratyčnaha ruchu ŭ Breście. U kancy 1990-ch — pačatku 2000-ch hadoŭ uznačalvaŭ Bresckuju haradskuju radu BNF. U 90-ja byŭ dyrektaram Bresckaj filii Biełaruskaha humanitarnaha adukacyjna-kulturnaha centra, kiravaŭ biełaruskim viečarovym licejem pry im.
Supracoŭničaŭ z hazietami «Briestskij kuŕjer», «Novy čas» i inšymi niezaležnymi ŚMI.
Viadomy jak eseist, aŭtar sotniaŭ publicystyčnych i litaraturna-krytyčnych artykułaŭ. Pierakładaŭ nie tolki ź niamieckaj, ale taksama z anhlijskaj i polskaj movaŭ dy z roznych movaŭ na niamieckuju.
U suaŭtarstvie ź Lavonam Barščeŭskim Jaŭhien Białasin padrychtavaŭ i vydaŭ «Karotkuju hramatyku niamieckaj movy». Aŭtar šmatlikich pierakładnych i ŭłasnych knih. Pierakładaŭ pieravažna niamieckamoŭnuju kłasiku.
Byŭ taksama apantanym rybałovam, pra heta svajo zachapleńnie napisaŭ knihu «Ščupakabra».
Kamientary