U Brasłavie karanavali cudatvorny abraz

U Brasłavie prajšła cyrymonija karanavańnia papskimi karonami abraza Božaj Maci Uładyčycy Azior. Hety abrad źjaŭlajecca ŭ katalickaj carkvie pryznańniem cudatvornaści ikony.

Zhodna z histaryčnymi śviedčańniami, abraz Božaj Maci Uładyčycy Azior kaliści znachodziŭsia ŭ hreka-katalickim klaštary, jaki ŭ 1832 hodzie zhareŭ ad udaru małanki. Cudoŭnym čynam abraz zachavaŭsia i ŭžo bolš za sto hadoŭ znachodzicca ŭ brasłaŭskim kaściole Naradžeńnia Najśviaciejšaj Panny Maryi. Abraz Božaj Maci Brasłaŭskaj staŭ pieršaj karanavanaj ikonaj u Viciebskaj vobłaści i siomaj — u Biełarusi. Raniej paćvierdžańnie svajoj cudatvornaści atrymali šeść abrazoŭ: Maci Božaj Bieraściejskaj (1996 hod), Maci Božaj Budsłaŭskaj (1998), minski abraz Biezzahannaha Začaćcia Božaj Maci (2005), Maci Božaj Kanhrehackaj ŭ farnym kaściole Hrodna (2005), Maci Božaj Hudahajskaj (2007), Božaj Maci Trakielskaj (2009).

Karanacyja prajšła na časovym ałtary, vybudavanym u formie karabla daŭžynioj 32 mietry, ustanoŭlenym u dvary brasłaŭskaha kaścioła. Pobač z ałtarom na nievialikaj jachcie pad biełymi vietraziami byŭ ustanoŭleny abraz, upryhožany viankom ź biełych lilej. Sam ałtar byŭ uvienčany mačtaj u vyhladzie kryža vyšynioj 22 mietry. Na ałtary znachodziŭsia chor, malitoŭnyja piesnapieńni jakoha supravadžali cyrymoniju.

Boskuju liturhiju i abrad karanacyi ŭznačaliŭ ksiondz-kardynał Jachim Majśnier, mitrapalit Kiolnski. Pierad abradam karanacyi jon pračytaŭ propaviedź, jakuju ź niamieckaj movy viernikam pierakłali na biełaruskuju.

Na płoščy kala kaścioła, pa roznych acenkach, sabrałasia ad piaci da dziesiaci tysiač čałaviek z roznych haradoŭ Biełarusi i šerahu inšych krain. Mnohija pałomniki pryjšli pakłanicca brasłaŭskaj śviatyni piechatoj. Na cyrymonii prysutničali pasły i pradstaŭniki dypłamatyčnych misij Indyi, Vialikabrytanii, Hiermanii, ZŠA, Słavakii, Polščy, kala 30 ijerarchaŭ katalickaj carkvy z 11 krain (Biełarusi, Rasii, Ukrainy, Polščy, Litvy, Łatvii, Hiermanii, Italii, Słavakii, Vialikabrytanii, ZŠA), a taksama pradstaŭniki Hreka-katalickaj i Ruskaj pravasłaŭnaj cerkvaŭ.

Załatyja karony, vyrablenyja ŭ Krakavie, byli nadzietyja spačatku na Isusa, a potym na Božuju Maci. Paśla hetaha biskup Viciebski Uładzisłaŭ Blin učyniŭ akt paśviačeńnia Viciebskaj dyjacezii pad apieku Božaj Maci Brasłaŭskaj, paśla čaho abraz raźmiaścili vysoka nad ałtarom-jachtaj dla ŭsieahulnaha ahladu.

Paśla cyrymonii vierniki z roznych krain padnieśli achviarnyja dary abrazu. Siarod ich byli załaty ružaniec, niekalki załatych čašaŭ, rasšytyja abrusy dla ałtara, partrety papy rymskaha Jana Paŭła II, abrazy, śviečki.

Zavieršycca cyrymonija ŭračystym pieraniasieńniem karanavanaha abraza ŭ hałoŭny ałtar kaścioła Naradžeńnia Najśviaciejšaj Panny Maryi.

Taćciana Čabatarova, BiełaPAN

• 0
• 0
• 0
• 0
• 0
• 0
• 0
• 0