Kudryn pieršym siarod čynoŭnikaŭ raspavioŭ Pucinu pra ciažkija nastupstvy vajny va Ukrainie

Pra heta raspaviali «Ahienctvu» dva znajomyja čynoŭniki. Pavodle ich infarmacyi, inšyja nabližanyja da kiraŭnika rasijskaj dziaržavy ničoha padobnaha prezidentu skazać nie rašalisia. Choć niezadavolenyja jość i siarod kiraŭnikoŭ klučavych dziaržstruktur, i siarod vajskoŭcaŭ.

Paviedamleńnie ab sustrečy Pucina i Kudryna źjaviłasia na sajcie Kramla 14 červienia — nijakich słoŭ pra padziei va Ukrainie ŭ stenahramie mierapryjemstva niama. Nasamreč, sustreča adbyłasia raniej, jašče viasnoj, a ŭ hetym miesiacy pres-słužba prezidenta apublikavała tolki jaje častku, nie zhadaŭšy pra toje, što kiraŭnik Padlikovaj pałaty ŭzdymaŭ temu vajny, śćviardžajuć jaho znajomyja.

Kudryn pačaŭ pradumvać razmovu jašče ŭ kancy sakavika. Na adnoj z sustreč z kalehami jon raspavioŭ, što źbirajecca da Pucina i choča jamu skazać, što vajna va Ukrainie pryviadzie da ciažkich nastupstvaŭ dla Rasii, śćviardžaje ŭdzielnik sustrečy. Inšy znajomy tak pieradaje łohiku Kudryna — jon ličyć, što Pucin nie ŭsprymaje jaho mierkavańnie pra palityku, ale daviaraje ekśpiertyzie ŭ ekanomicy i finansach. Tamu jon vyrašyŭ ničoha nie kazać kiraŭniku dziaržavy pra svajo staŭleńnie da bajavych dziejańniaŭ jak takich, zatoje skazać, što, na jaho dumku, vajna škodnaja ekanomicy Rasii. U vyniku Kudryn mienavita ŭ takoj formie davioŭ svajo mierkavańnie prezidentu.

Pucin na hetaje vykazvańnie Kudryna nijak nie adreahavaŭ, śćviardžaje znajomy kiraŭnika Padlikovaj pałaty.

Niahledziačy na svaju niazhodu z vajnoj sychodzić u adstaŭku Kudryn nie źbirajecca. Jon ličyć, što budzie bolš karysna, kali jon zastaniecca na pasadzie i pasprabuje ŭpłyvać na situacyju, kaža jaho znajomy, nie ŭdakładniajučy, u čym mienavita zaklučajecca hety ŭpłyŭ.

U rasijskaj elicie niamała ludziej, jakija niezadavolenyja vajnoj, ale nichto z surazmoŭcaŭ «Ahienctva» nie čuŭ, kab jany vykazvali Pucinu svaje dumki.

Bolšaść takich niezadavolenych prosta znachodziacca ŭ razhublenaści — naprykład, kiraŭnik «Śbiera» Hierman Href. Z top-mieniedžmientu banka zvolnilisia nie mienš za 200 čałaviek, heta značnaja častka kiraŭnictva banka, i Href pieražyvaje za budučyniu svajoj struktury, śćviardžaje były vysokapastaŭleny supracoŭnik «Śbiera».

Niezadavolenaść dziejańniami kiraŭnictva krainy ŭ pryvatnych razmovach vykazvali kaleham i vysokapastaŭlenyja supracoŭniki Hałoŭnaha raźviedvalnaha ŭpraŭleńnia, śćviardžaje surazmoŭca «Ahienctva», blizki da rasijska-ŭkrainskich pieramovaŭ. Na pačatku červienia vydańnie «Ukrainskaja praŭda» paviedamiła, što pieramovy ab zdačy abaroncaŭ «Azoŭstali» viali ŭkrainskaje Hałoŭnaje ŭpraŭleńnie raźviedki i rasijskaje HRU, jakija na pačatku maja damovilisia pra harantyi na zachavańnie pravoŭ pałonnych. Praŭda, u vyniku pravy ŭkraincaŭ nie byli vykananyja — mnohija ź ich byli adpraŭlenyja ŭ «DNR», dzie im pahražaje śmiarotnaje pakarańnie. Surazmoŭca «Ahienctva» paćviardžaje hetuju infarmacyju — pa jaho słovach, supracoŭniki HRU, jakija mieli dačynieńnie da pieramovaŭ, byli aburanyja tym, što Rasija nie vykanała dasiahnutyja damoŭlenaści.

U rozny čas ŚMI paviedamlali i pra inšych niezadavolenych. Naprykład, kiraŭnicu CB Elviru Nabiulinu i staršyniu VTB Andreja Kościna. Adnak na adstaŭku navažyŭsia tolki ciapier užo były śpiecpradstaŭnik prezidenta Anatol Čubajs.

• 73
• 0
• 14
• 20
• 4
• 8
• 6
• 0