Kiraŭnik MZS Litvy skazaŭ, kudy Rasija pavinna źviartacca nakont spynieńnia tranzitu
Ministr zamiežnych spraŭ Litvy Habryjelus Łandśbierhis skazaŭ, što kali ŭ Rasii jość pytańni ŭ suviazi z prymianieńniem jeŭrapiejskich sankcyj, to jana moža źviartacca ŭ Jeŭrakamisiju pa dadatkovyja tłumačeńni. A kali i jany joj nie padychodziać, jana moža źviartacca ŭ Jeŭrapiejski sud, piša Delfi.lt
«Maja parada takaja — kali jość realnaja patreba i žadańnie z boku Racii, to treba źviartacca ŭ JEK z prośbaj dać dadatkovyja tłumačeńni. Kali jany nie padychodziać, jość Jeŭrapiejski sud, jaki razhladaje ŭsie ciažby», — skazaŭ ministr. Rasijskuju reakcyju Łandśbierhis nazvaŭ častkaj «padrychtavanaha teatra, kab usie vystavić u dramatyčnym śviatle».
«Pa maich danych, RF čakała zakryćcia našmat raniej i spadziavałasia na palityčnyja padstavy. Palityčna takija rašeńni nie byli pryniatyja. Ich prymajuć na ŭzroŭni zakonaŭ tady, kali JEK bačyć dla hetaj padstavy», — zaŭvažyŭ jon. Łandśbierhis źviarnuŭ uvahu na toje, što ŭ pieršych zajavach z boku Rasii niby nieznarok było šmat niapraŭdy.
«Naprykład, daty, u jakija pieravozka praź Litvu pavinna była być spynienaja, paznačanyja niapravilna. Cemient ciapier možna vazić, a žycharam Kalininhrada kazali, što nielha, treba ciapier jaho kuplać. Toje ž samaje i z dataj dastaŭki nafty. Jaje pieranieśli na bolš rańni termin», — praciahnuŭ ministr. Jon nazvaŭ reakcyju Rasii sprobaj dramatyzavać situacyju.
«Kali zirnuć na ahulnyja maštaby tranzitu praź Litvu, to sankcyjanavanych tavaraŭ, kali zabarona ŭstupić u siłu całkam, budzie mienš za pałovu. Heta značyć, što nijakaj błakady niama. Nijakaha zakryćcia niama. Tranzit jość. Tranzit ludziej byŭ i budzie, kali JEK ničoha nie źmienić […], ale pakul ja nie baču prykmiet hetaha. Usia hetaja rytoryka, jakuju my čujem z druhoha boku, nakiravanaja na ŭnutrany rynak, na mabilizacyju svaich žycharoŭ», — ličyć Łandśbierhis.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary