Va Ukrainie zatrymali ludziej, jakija nibyta rychtavali zabojstva ministra abarony i kiraŭnika raźviedki
Słužba biaśpieki Ukrainy zajaviła, što rasijskaje HRU rychtavała zamach na ministra abarony Ukrainy Alaksieja Reźnikava i kiraŭnika Hałoŭnaha ŭpraŭleńnia raźviedki Kiryłu Budanava.
SBU śćviardžaje, što ŭ skład hrupy ŭvajšoŭ žychar Łuhanska, jaki vajavaŭ u samaabvieščanaj «ŁNR» suprać ukrainskich vajskoŭcaŭ. Hety čałaviek, jak piša SBU, pavinien byŭ znajści kilera dla ździajśnieńnia zakaznych zabojstvaŭ. Va Ukrainu jon prybyŭ praź Biełaruś.
Na prapanovu pahadziŭsia žychar Kijeva, jaki za 5 tysiač dalaraŭ pahadziŭsia zabić ukrainskaha vajskoŭca, nibyta, jak śćviardžali zamoŭcy, datyčnaha da raspravaŭ nad rasijskimi vajennapałonnymi. Heta ličyłasia «testavym zadańniem».
Abodva ciapier zatrymanyja, ich padazrajuć u dziaržaŭnaj zdradzie.
Ukrainskim vajskoŭcam, jakoha nibyta chacieli zabić razam z Reźnikavym i Budanavym, moža być Siarhiej Karatkich (viadomy taksama pad mianuškami «Maluta» i «Bocman») — u minułym adzin ź lidaraŭ «Azova» i partyi «Nacyjanalny korpus». Pra heta paviedamlaje vydańnie «Strana» sa spasyłkaj na svaje krynicy.
Siarhiej Karatkich — uradženiec Biełarusi, mieŭ taksama i biełaruskaje hramadzianstva. Z 2014 hoda jon žyvie va Ukrainie. U składzie bataljona «Azoŭ» vajavaŭ na Danbasie. Jaho ličać blizkim da byłoha kiraŭnika MUS Ukrainy Arsiena Avakava. Taksama śćviardžałasia, što jon mieŭ dačynieńnie da «Biełaruskaha doma va Ukrainie», kiraŭnika jakoha Vitala Šyšova znajšli ŭ minułym hodzie paviešanym.
Kamientary