Makiej: Nichto ŭ Biełarusi nie byŭ pakarany za svaje palityčnyja pohlady
Ministr zamiežnych spraŭ Biełarusi Uładzimir Makiej u intervju telekanału France 24 zajaviŭ, što ŭ biełaruskim zakanadaŭstvie niama artykuła za palityčnyja pohlady, a tamu kazać pra najaŭnaść palitviaźniaŭ niedarečna, piša reform.by. Makiej zapeŭniŭ, što mnohija zatrymanyja ŭžo znachodziacca na voli.
Uładzimir Makiej u intervju telekanału France 24 pierakonvaŭ žurnalista, što ŭ Biełarusi siadziać vyklučna tyja, chto «padryvaŭ» i «rychtavaŭ zamachi».
«Jak my možam nazvać palitviaźniami tych ludziej, chto padryvaŭ milicejskija mašyny, chto padryvaŭ administracyjnyja budynki, chto rychtavaŭ zamachi na milicyjantaŭ, chto rabiŭ sproby arhanizavać terarystyčnyja akty na čyhuncy i h. d. Ja liču, što ŭ Francyi za hetyja ž pravinnaści pakarańnie było b vielmi surovym», — zajaviŭ dypłamat.
Na heta žurnalist zaznačyŭ, što, na dumku pravaabarončych arhanizacyj, ludzi atrymali turemnyja terminy za svaje pohlady, a nie za toje, što jany rabili. «Mienavita tamu Jeŭropa zajaŭlaje, što nie moža vieści dyjałoh ź Biełaruśsiu», — padkreśliŭ jon.
«Nichto ŭ Biełarusi nie praśledujecca za palityčnyja pohlady», — zajaviŭ Makiej.
Pry hetym jon zaznačyŭ, što Biełaruś vystupaje za dyjałoh navat va ŭmovach sankcyj.
«My zaŭsiody kažam: my chacieli b mieć šerah kanałaŭ dla kamunikacyi ź JEZ adčynienymi, pakolki my zacikaŭlenyja ŭ JEZ, u pieršuju čarhu, jak u dobrym handlova-ekanamičnym partniory. Bo my ž susiedzi. My chacieli b dyviersifikavać našu ekanomiku, dyviersifikavać našu palityku. Ale, na žal, my nie bačym hatoŭnaści z boku jeŭrapiejskich partnioraŭ», — skazaŭ jon.
U Biełarusi palitviaźniami pryznanyja 1346 čałaviek. Pieravažnaja bolšaść ź ich siadzić za niehvałtoŭnyja dziejańni ci navat prosta za kamientaryi ŭ sacsietkach. Siarod palitviaźniaŭ — dziasiatki žurnalistaŭ i pravaabaroncaŭ.
Kamientary
zakanadaŭstvie niama artykuła za palityčnyja pohlady, a tamu kazać pra
najaŭnaść palitviaźniaŭ niedarečna,