«Pieršaja piaciorka»: chto tyja biełarusy, jakich buduć sudzić zavočna
Śledčy kamitet apublikavaŭ śpis ź piaci čałaviek — heta biełarusy, jakich padazrajuć u deanonie siłavikoŭ. Siarod ich zasnavalnik Sports.ru Dźmitry Navoša, redaktarka «Karacielaŭ Biełarusi» Janina Sazanovič, taksama Daniił Bahdanovič, Volha Vysockaja i Valeryja Zaniamonskaja.
Dźmitryj Navoša — samy viadomy ŭ śpisie. Uradženiec Biełarusi, doŭhi čas pražyŭ ŭ Rasii, dzie stvaryŭ samy papularny spartyŭny partał Sports.ru.
Paśla vybaraŭ 2020 hoda Dźmitryj padtrymlivaŭ biełarusaŭ, jakija pratestavali suprać falsifikacyi vybaraŭ i hvałtu nad ludźmi. Siońnia Navoša žyvie ŭ Ispanii.
Čytajcie taksama: Navoša: Kali ŭ nas zabiaruć majomaść, značyć, i łukašenkaŭcy buduć ułasnaj majomaści paśla vypłačvać kampiensacyi palitviaźniam
Janina Sazanovič — redaktarka kanała «Karacieli Biełarusi», dzie taksama publikujuć źviestki pra siłavikoŭ i čynoŭnikaŭ.
Taksama Janina viadzie jutub-pieradaču, dzie padrabiazna prachodzicca pa piersanalijach, datyčnych da represij. Niadaŭna jaje minskuju kvateru pakazalna razhramiŭ HUBAZiK. Siłaviki sami vykłali videa razbureńniaŭ u kvatery i pahražali, što mohuć zavitać da svajakoŭ Janiny.
Raniej Navoša i Valeryja Zaniamonskaja ŭžo fihuravali ŭ dziaržaŭnych ŚMI — ich padazravali ŭ stvareńni «Čornaj knihi Biełarusi». Heta byŭ śpis asobaŭ, jakija ŭdzielničali ŭ represijach suprać biełarusaŭ, u «Čornaj knizie» publikavalisia piersanalnyja źviestki sudździaŭ, milicyjantaŭ, čynoŭnikaŭ i h.d.
Zaniamonskaja, jak i jašče dvoje fihurantaŭ śpisa (Daniła Bahdanovič i Volha Vysockaja) nibyta vučylisia ŭ EHU razam z Safijaj Sapiehaj. Usie jany mieli dačynieńnie da «Čornaj knihi» i publikacyj piersanalnych danych siłavikoŭ, pisali dziaržaŭnyja ŚMI padčas suda nad Safijaj Sapiehaj. Sapieha atrymała 6 hadoŭ kałonii. Da jaje siabroŭ daciahnucca nie mohuć — ciapier buduć sudzić zavočna.
Darečy, proźviščy Navošy i Bahdanoviča ahučvaŭ u svaim «intervju» taksama zatrymany Raman Pratasievič. Maŭlaŭ, byŭ vialiki čat arhanizataraŭ i kaardynataraŭ pratestaŭ, siarod jakich byli i hetyja asoby.
Zrazumieła, što heta tolki pieršyja łastaŭki. Śledčy kamitet zavioŭ navat śpiecyjalny telehram-kanał, dzie buduć publikavacca imiony i proźviščy «zavočnikaŭ». Chutka ich stanie bolš.
A paśla «asudžanych» buduć pazbaŭlać biełaruskaha hramadzianstva. Adpaviednyja papraŭki ŭžo padrychtavanyja.
Artykuły, pa jakich abvinačvajuć usich piaciarych, adnolkavyja. Heta raspalvańnie varožaści hrupaj asobaŭ (častka 3 art.130 KK) i zbor i raspaŭsiud piersanalnych dadzienych (art.203 KK).
Pahražaje kožnamu z «pieršaj piaciorki» da 12 hadoŭ źniavoleńnia.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary