30-hadovamu palitviaźniu prysudzili 10 hadoŭ strohaha režymu. Jaho nazyvali vizualnym redaktaram rolikaŭ «Kibierpartyzanaŭ»
Brescki abłasny sud vynies žorstki prysud pa kryminalnaj spravie palitźniavolenaha Dzianisa Salmanoviča. Jaho pryznali vinavatym adrazu pa piaci artykułach Kryminalnaha kodeksa, paviedamlajuć pravaabaroncy.
Sudovy praces, jaki pačaŭsia 20 vieraśnia, vioŭ sudździa Mikałaj Leščanka.
Salmanoviča ŭziali pad vartu 4 kastryčnika 2021 hoda pa abvinavačvańni ŭ spryjańni teraryzmu i ŭdziele ŭ terarystyčnaj arhanizacyi, a taksama ŭ raspalvańni rasavaj, nacyjanalnaj, relihijnaj albo inšaj sacyjalnaj varožaści. Dzianisa siłaviki nazyvali «hałoŭnym vizualnym redaktaram» rolikaŭ «Kibierpartyzan» i «Supracivu».
U dzień zatrymańnia supracoŭniki HUBAZiKu z telefona zatrymanaha napisali maci: «Ja nie mahu razmaŭlać, mnie nie chapaje pavietra, ja zadychajusia».
Dzianisu 30 hadoŭ. U dzień zatrymańnia jon byŭ doma z małodšaj siastroj, na toj momant jana była niepaŭnaletniaj.
«Siłaviki ŭvarvalisia ŭ dom ranicaj, pačali abražać dačku roznymi słovami, sprasonku jana ničoha nie zrazumieła. Jana čuła, jak hetyja nieludzi ŭvarvalisia ŭ pakoj da Dzianisa, a jon tady chvareŭ karanavirusam», — raspaviadała jahonaja maci.
Sud pryznaŭ Dzianisa Salmanoviča vinavatym i pa sukupnaści abvinavačańniaŭ prysudziŭ jamu pazbaŭleńnie voli terminam na 10 hod va ŭmovach uzmocnienaha režymu, a taksama štrafu ŭ pamiery 6 400 rubloŭ, piša Biełsat.
Jašče napieradzie Salmanoviča čakaje razhlad hramadzianskaha pazovu na sumu 33 000 rubloŭ za niby pierakryćcio daroh.
Kamientary