Palicejski ź Bierlina nazyvaŭ siabie «biełaruskim atamanam» i ŭpotaj ad načalstva jeździŭ u Minsk
Ziamielnaje viedamstva pa kryminalnych spravach u Bierlinie zaviało dyscyplinarnuju spravu i adchiliła ad pracy adnaho z supracoŭnikaŭ, jaki nieadnarazova rabiŭ pryvatnyja pajezdki ŭ Rasiju i Biełaruś, nie paviedamlajučy pra heta načalstvu. Akramia taho, Michaela B. padazrajuć u suviaziach z pravymi ekstremistami i rasijskaj vajenizavanaj kazackaj hrupoŭkaj. Pra heta havorycca ŭ sumiesnym rasśledavańni vydańniaŭ ARD Kontraste, Die Zeit i «Mieduza», apublikavanym 8 listapada, piša Deutsche Welle.
U pačatku 2022 hoda bierlinskaje ziamielnaje viedamstva pa achovie Kanstytucyi paviedamiła načalstvu palicejskaha Michaela B., što toj hadami nie paviedamlaŭ ab pryvatnych pajezdkach u Rasiju i Biełaruś. Pa zakonie ab dopusku da sakretnych dakumientaŭ supracoŭniki niekatorych śpiecsłužbaŭ FRH abaviazanyja infarmavać svajo kiraŭnictva pra takija vizity.
Sam Michael B. admoviŭsia kamientavać hetuju infarmacyju žurnalistam, skazaŭšy tolki, što «zaŭsiody pra ŭsio paviedamlaŭ».
Viedamstva pa achovie Kanstytucyi pieradało bierlinskamu načalstvu palicejskaha fatahrafiju z adnoj takoj pajezdki, dzie Michael B. paziruje ź viadomym palicyi pravym ekstremistam, Jorham S.
Pavodle źviestak śpiecsłužby, mužčyny jak minimum dvojčy — u 2017 i 2020 hadach — razam jeździli ŭ Biełaruś, a taksama naviedvali Rasiju.
Pravyja ekstremisty i padrychtoŭka da «dnia Ch»
Jorh S., ź jakim sfatahrafavaŭsia słužačy palicyi, ličycca ŭdzielnikam pravaj ekstremisckaj hrupoŭki «Paŭnočny kryž» (Nordkreuz), pra dziejnaść jakoj stała viadoma ŭ 2017 hodzie. Hrupoŭka naličvała kala 50 čałaviek, u joj byli ŭ tym liku palicejskija i byłyja sałdaty bundeśviera. U ich płany ŭvachodziła padrychtoŭka da «dnia Ch», kali «ŭ Hiermanii abryniecca hramadski paradak».
Udzielniki hrupoŭki dyskutavali pra palityčnyja zabojstvy, zajmalisia ahniavoj padrychtoŭkaj i stvarali schrony sa zbrojaj i bojeprypasami, u jakich byli znojdzienyja i patrony, skradzienyja z arsienałaŭ palicyi.
«Ataman» ź niamieckaj palicyi
Pajezdki ŭ Rasiju i Biełaruś byli źviazanyja z arhanizacyjaj «Asacyjacyja družby narodaŭ», staršynioj i suzasnavalnikam jakoj byŭ Michael B. Zhodna z unutranym dakumientam arhanizacyi, na jaki spasyłajucca aŭtary rasśledavańnia, jaje členy nazyvajuć siabie «kazakami» i «hvardziejcami».
Pavodle infarmacyi ARD Kontraste, Die Zeit i «Mieduzy», «Asacyjacyja družby narodaŭ» źviazanaja z tak zvanym «Usievialikim vojskam Danskim» — rasijskaj vajenizavanaj kazackaj hrupoŭkaj, atrady jakoj vajavali va Ukrainie ŭ 2014 hodzie.
Pry hetym Michael B. u biełaruskim adździaleńni hetaj arhanizacyi mieŭ čyn «atamana», pišuć žurnalisty.
Kamientary