Cichanoŭskaja: Zaraz vyrašalny momant našaj z vami historyi. My ryzykujem stracić svaju niezaležnaść
Demakratyčny lidar Biełarusi Śviatłana Cichanoŭskaja źviarnułasia da biełarusaŭ z padziakaj za krytyku i zaklikaje nie adčajvacca.
«Chopić svarycca. Čamu vy nie možacie abjadnacca i pracavać razam? My nie za heta zmahalisia ŭ 2020». Mnie časta pišuć takija paviedamleńni. Ja cudoŭna ich razumieju. U 2020 hodzie ŭsia Biełaruś abjadnałasia vakoł adnoj mety — vyzvalić našuju krainu i našych rodnych ad dyktatury. Ale praz dva hady my bačym, što naš šlach apynuŭsia bolš składanym i zaciahnuŭsia nadoŭha. Mnohija nie viedajuć, što jašče možna zrabić, kab heta skončyłasia. Chtości, adčuvajučy adčaj, sprabuje znajści vinavatych», — napisała Śviatłana Cichanoŭskaja ŭ svaim telehram-kanale.
«Ja časam chvalujusia nie mienš, čym vy, i nie mahu zabaranić heta inšym. My ŭsie majem prava na našyja emocyi i na pytańni. Ale ja tolki chaču nahadać, jak važna bierahčy adno adnaho. Svarycca, ale nie stanavicca vorahami. Krytykavać, ale nie spyniacca iści razam da ahulnaj mety», — miarkuje demakratyčnaja lidarka.
«Zaraz vyrašalny momant našaj z vami historyi. My ryzykujem stracić svaju niezaležnaść. My ryzykujem stracić svaich rodnych, kali Łukašenka jašče bolš uciahnie nas u hetuju biessensoŭnuju vajnu. My ryzykujem usim. Ale situacyja za apošnija dva hady tolki paharšajecca, i tamu my ŭžo nie adčuvajem kryzis tak vostra, my tolki adčuvajem stomlenaść i adsutnaść padtrymki. I žadańnie, kab usio heta chutčej skončyłasia».
«Ja šmat razoŭ kazała, što nam treba trymacca razam. Być razam — heta dapamahčy čałavieku, jaki z časam zdolny bačyć tolki bol, — ubačyć nadzieju. Abniać jaho. Natchnić. Nadać siły. Pavieryć u jaho i ŭ siabie samoha. Skazać «dziakuj»», — zaklikaje palityk.
«Ja chaču skazać dziakuj usim, chto mianie krytykuje. Ja chaču skazać dziakuj za toje, što vam nie ŭsio adno. Što vy nie zabylisia, nie adpuścili bol za našuju budučyniu i sučasnaść, i šukajecie mahčymaść usio vypravić».
Cichanoŭskaja zaklikaje nie paddavacca rospačy i adčaju:
«Ja viedaju hetaje pačućcio rospačy i strachu stracić toje, što lubiš. Ja viedaju, što mienavita jano vami ruchaje. I prosta chaču skazać vam dziakuj, bo mnie hetak ža baluča, jak i vam.
Ja zaklikaju vas skazać dziakuj tym, chto mienš za ŭsio ad vas hetaha čakaje. Davajcie ŭzhadajem, što my adzin narod, i dapamožam adno adnamu ŭ hety składany epizod našaj historyi».
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary