Vynieśli prysud inžynieru, pa vinie jakoha zahinuŭ čałaviek u muziei Janki Kupały
Sud vynies prysud 34-hadovamu inžynieru, jaki amal dva hady tamu paškodziŭ sistemu pažaratušeńnia ŭ muziei Janki Kupały, z-za čaho zahinuŭ čałaviek. Padrabiaznaści raskazali ŭ prakuratury Minska.
Śledstvu ŭdałosia ŭstanavić, što 34-hadovy abvinavačany, źjaŭlajučysia inžynieram kantrolna-vymiaralnych pryboraŭ i aŭtamatyki, ranicaj 5 žniŭnia 2021 hoda byŭ u pamiaškańni fondaschovišča muzieja Janki Kupały. Z-za niaŭvažlivaści i nieabačlivaści pry praviercy abstalavańnia jon nibyta zapuściŭ sistemu pažaratušeńnia.
U vyniku hetaha rečyvy dla tušeńnia ahniu (havorka idzie pra vuhlakisły haz) raspaŭsiudzilisia pa fondaschoviščy, a taksama pa cokalnym paviersie. U hety momant tam u adnym z pamiaškańniaŭ znachodziŭsia supracoŭnik muzieja, jaki paźniej pamior ad atručeńnia dvuchvokisam vuhlarodu.
U prakuratury Minska raskazali, što padčas sudovaha pasiadžeńnia abvinavačany pryznaŭ svaju vinu ŭ poŭnym abjomie i rastłumačyŭ, što pa pryčynie ahladu ŭstanoŭki hazavaha pažaratušeńnia jon padniaŭsia na niaŭstojlivuju pavierchniu i straciŭ raŭnavahu. Padčas padzieńnia jon zapuściŭ modul hazavaha pažaratušeńnia.
Adznačajecca, što abvinavačany ŭ dobraachvotnym paradku kampiensavaŭ synu zahinułaha 50 tysiač rubloŭ u košt kampiensacyi maralnaj škody.
U vyniku abvinavačanamu na padstavie častki 1 artykuła 144 Kryminalnaha kodeksa było pryznačana pakarańnie ŭ vyhladzie abmiežavańnia voli na termin 1 hod i 6 miesiacaŭ biez nakiravańnia ŭ papraŭčuju ŭstanovu adkrytaha typu.
Pry hetym u adpaviednaści z artykułam 7 zakona «Ab amnistyi ŭ suviazi z Dniom narodnaha adzinstva» jon byŭ častkova — na adzin hod, — vyzvaleny ad pryznačanaha pakarańnia.
Ciapier čytajuć
U Biełarusi množacca placoŭki dla tancaŭ na śviežym pavietry — pahladzicie, jak adpalvajuć razam moładź i piensijaniery ŭ Sierabrancy11
Kamientary