Prysud homielskamu žurnalistu-fryłansieru Jaŭhienu Mierkisu abvieściać 30 maja
U Homielskim abłasnym sudzie 25 maja praciahvaŭsia razhlad kryminalnaj spravy žurnalista-fryłansiera i krajaznaŭcy Jaŭhiena Mierkisa. Jaho abvinavačvajuć u stvareńni ekstremisckaha farmavańnia albo ŭdziele ŭ im (č. 3 art. 361-1 KK), a taksama ŭ sadziejničańni ekstremisckaj dziejnaści (č. 1 i 2 art. 361-4 KK), paviedamlaje «Viasna».
Spravu ŭ zakrytym režymie razhladaje sudździa Alaksiej Chłyščankoŭ.
Jaŭhiena Mierkisa zatrymali 13 vieraśnia 2022 hoda ŭ Homieli. Pa miescy žycharstva byŭ praviedzieny pieratrus, u chodzie jakoha kanfiskavali nośbity infarmacyi. Da suda žurnalist byŭ źmieščany ŭ SIZA № 3 Homiela.
Mierkis aśviatlaŭ akcyi pratestu paśla prezidenckich vybaraŭ 2020 hoda, vioŭ strymy ź mitynhaŭ tak zvanych «darmajedaŭ». Jaho nieadnarazova zatrymlivała milicyja, praz sudy štrafavali i adpraŭlali na sutki. Ahułam za svaju žurnalisckuju dziejnaść Mierkisu prysudzili 50 sutak aryštu i bolš za 200 bazavych vieličyń štrafaŭ.
Paśla pryznańnia šerahu niezaležnych miedyja ekstremisckimi farmavańniami Jaŭhien zajmaŭsia krajaznaŭčaj i histaryčnaj dziejnaściu.
Sudovy praces prachodzić to ŭ zakrytym, to ŭ adkrytym režymie z 11 maja.
Učora ŭ sudzie adbylisia sprečki bakoŭ (prakurora i advakata). Jaki termin zapytaŭ prakuror — nieviadoma.
30 maja Jaŭhien Mierkis vystupić z apošnim słovam, paśla čaho budzie abvieščany prysud. Pasiadžeńnie adkrytaje, pačatak u 14:00.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ16
Kamientary