Biełaruska Aryna Sabalenka na pres-kanfierencyi, jakaja papiaredničała pačatku Uimbłdanskaha turniru, zajaviła, što zaraz budzie razmaŭlać tolki pra tenis.
Druhaja rakietka śvietu i čempijonka Adkrytaha čempijanatu Aŭstralii bajkatavała dźvie pres-kanfierencyi na niadaŭnim Adkrytym čempijanacie Francyi («Rałan Haros») paśla taho, jak sutyknułasia sa škvałam pytańniaŭ nakont vajny i jaje suviaziaŭ z Alaksandram Łukašenkam.
«Pierš čym my praciahniem, ja chacieła b skazać, što nie źbirajusia kazać pra palityku», — zajaviła 25-hadovaja spartoŭka na tradycyjnym bryfinhu dla miedyja pierad startam Uimbłdana.
«Ja tut tolki dla razmovy pra tenis. Kali łaska, pavažajcie heta».
«Kali ŭ vas jość jakija-niebudź palityčnyja pytańni, vy možacie zadać ich WTA abo [pradstaŭnikam] turniru. Jany mohuć dasłać vam rasšyfroŭku maich adkazaŭ z papiarednich turniraŭ», — skazała tenisistka.
Aryna dadała, što heta jaje asabistaje rašeńnie.
Nahadajem, što 6 červienia paśla čverćfinału «Rałan Haros» Sabalenka čarhovy raz spytali nakont staŭleńnia da vajny i piersanalna da Alaksandra Łukašenki. I atrymali niečakany adkaz.
— Vy kažacie, što nie padtrymlivajecie vajnu. Ale vy pa-raniejšamu padtrymlivajecie Alaksandra Łukašenku? — spytali tady Sabalenka.
— Nu, heta składanaje pytańnie. Ja nie padtrymlivaju vajnu, to-bok nie padtrymlivaju Łukašenku prama ciapier, — adkazała tady Sabalenka, jakaja pierad hetym admaŭlałasia kamientavać padtrymku biełaruskaha dyktatara i vajnu va Ukrainie, u vyniku čaho jaje pres-kanfierencyi prachodzili navat u paŭsakretnym režymie ci naohuł nie adbyvalisia.
Uimbłdanski turnir (Adkryty čempijanat Anhlii pa tenisie) startuje ŭ paniadziełak. Aryna Sabalenka, jak i pieršaja rakietka śvietu Iha Śviontak, razhladajucca hałoŭnymi pretendentkami na tytuł.
U pieršym raŭndzie biełaruska ŭ aŭtorak zhulaje ź vienhierkaj Panaj Udvardzi (85-ja rakietka śvietu).
U minułym hodzie biełaruskija i rasijskija tenisisty nie byli dapuščanyja da Uimbłdana, jaki vyjhrała pradstaŭnica Kazachstana Alena Rybakina.
U 2021-m Aryna dajšła da paŭfinału Uimbłdana. U 2020 hodzie turnir byŭ admienieny z-za kavidu, a ŭ 2019-m spartsmienka vybyła ŭ pieršym kruzie.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary