Hruzija zabaraniaje, a Litva ŭzmacniaje kantrol. Nabyć mašynu sa Štataŭ stanie jašče składaniej
Z 1 žniŭnia na terytoryi Hruzii zabaronieny reekspart u Rasiju i Biełaruś transpartnych srodkaŭ, impartavanych z ZŠA. A litoŭskaja mytnia pačała bolš pilna sačyć za tym, kab aŭtamabili, nabytyja biełarusami ŭ Štatach, potym nie apynulisia ŭ Rasii.
Šlach praz Hruziju — zakryty
Da 25 vieraśnia z Hruzii ŭ RF i Biełaruś jašče možna budzie ekspartavać aŭtamabili, u dačynieńni da jakich damova kupli-prodažu była aformlenaja da 25 červienia. Potym reekspart aŭto z Hruzii ŭ Rasiju i Biełaruś stanie niemahčymy.
Cikava, što aŭtamabili — heta treci pavodle vieličyni ekspartny tavar Hruzii ŭ RF. Za šeść miesiacaŭ 2023 hoda z Hruzii ŭ Rasiju było ekspartavana ahułam 3786 aŭtamabilaŭ na sumu 53 miljony dalaraŭ. Pry hadavym padliku ekspart vyras na 274%.
Ale kali pahladzieć na apublikavanuju Hruzijaj statystyku, to možna ŭbačyć, što značny rost ekspartu aŭto nazirajecca i ŭ inšyja krainy JEAES. Tak, naprykład, na pieršym miescy pavodle ahulnaj kolkaści idzie Kyrhyzstan z 236 miljonami dalaraŭ. Stolki kaštavała 5840 adzinak techniki, jakija za šeść miesiacaŭ biahučaha hoda ekspartavali ŭ hetuju krainu.
Siaredniaja cana impartavanaha aŭtamabila z Hruzii ŭ Kyrhyzstan składaje 40 410 dalaraŭ ZŠA! Heta daje padstavy mierkavać, što, prynamsi, častka hetych mašyn tolki razmytnioŭvałasia praz Kyrhyzstan, a dalej nakiroŭvałasia ŭ RF. Rost ekspartu aŭto z Hruzii ŭ Kyrhyzstan skłaŭ 1673%.
Z 26 vieraśnia z terytoryi Hruzii taksama budzie zabaronieny reekspart u Biełaruś i RF mašyn, impartavanych ź ES. Heta praduhledžana 11-m pakietam sankcyj.
Abiacańnie nie pierapradavać aŭto ŭ RF
Taksama, jak stała viadoma «Našaj Nivie», litoŭskaja mytnia z 1 žniŭnia ŭzmacniła kantrol za tym, kab aŭtamabili, nabytyja biełarusami ŭ Štatach, vykarystoŭvalisia ŭ Biełarusi, a nie byli pierapradadzienyja ŭ RF.
U suviazi z novym pakietam sankcyj mytnia Litvy, aproč invojsa na aŭto, ciapier patrabuje dadatkovyja dakumienty.
Heta paćviardžeńnie apłaty, kopija pašparta pakupnika. Danyja płacielščyka musiać supadać z kančatkovymi danymi klijenta, jakija paznačanyja ŭ invojsie.
Aproč taho, ad uładalnika transpartnaha srodku ciapier patrabujuć napisać list, dzie toj abaviazvajecca nie pradavać aŭto ŭ Rasiju paśla vyvazu transpartu ź ES i paćviardžaje, što transpartny srodak nabyty dla pryvatnaha vykarystańnia na terytoryi Biełarusi.
Ciapier čytajuć
Zialenski: Retranślatary na miažy Biełarusi prypynili pracu71
Zialenski: Retranślatary na miažy Biełarusi prypynili pracu
U Vialikaj Miadźviadcy adšukali mahiłu brata Ihnata Damiejki. Pahladzicie, jak spaskudzili carkvu pobač, jakuju naviedvaŭ suśvietna viadomy navukoviec1212
Kamientary