Artykuł Alaksandra Kłaskoŭskaha pra samit EŭzAzES u Sočy
Chacia samit abviaścili niefarmalnym, biełaruski prezydent zavitaŭ da Pucina ŭ halštuku. Adrazu vidno, što nie rassłablacca prylacieŭ u Sočy. Ceny na haz – heta dla Miensku pytańnie hamletaŭskaje.
Napiaredadni eŭfaryju sparadziła publikacyja na sajcie rasiejskaha Ministerstva ekanamičnaha raźvićcia i handlu. Z prahnozu na nastupny hod vynikaje, što haz nam źbirajucca pradavać pa $70--95. Ale heta toj vypadak, kali varta kazać pra «Maskvu šmathałovuju», ličyć naš ekanamist Jarasłaŭ Ramančuk: «U Hiermana Hrefa svaje raźliki, a ŭ «Hazproma» svaje».
I sapraŭdy, eŭfaryju ledzianym strumieniem astudziła krynica ŭ Kramli. U interviju nabližanaj ahiencyi «RIA Novosti» ananim z Pucinavaha atačeńnia zaznačyŭ, što biełaruski bok marna ciahnie ryzinu, spadziejučysia na palityčnaje vyrašeńnie hazavaj prablemy. «Było b dziŭna, kab pytańnie cenaŭ na haz vyrašałasia na ŭzroŭni prezydenta», – reziumavała krynica.
Vyhladaje na toje, što biełaruskamu kiraŭniku vietliva pažadali ŭsio ž rassłabicca... Ale naŭrad ci paśla takich ekivokaŭ atrymaješ asałodu ad file marskoha čorta, jakim častavali ŭ «Bačaravym ručai». Letašni cud, kali Pucin ŭ Sočy raptam (chacia nasamreč nia raptam i nia prosta tak) rasščodryŭsia na tanny haz, pradublavać peŭna ž nie pašancuje. U adno Čornaje mora dvojčy taksama nia ŭvojdzieš.
Nie vypadaje nadta radavacca i ad taho, što Rasieju «prakinuli» z ustupleńniem u Suśvietnuju handlovuju arhanizacyju. Praŭda, napiaredadni niefarmalnaha samitu EŭrazES u Sočy maskoŭskija medyi trubili, što Kreml u piku prydzirlivamu Zachadu zrobić z hetaj arhanizacyi alternatyvu SHA. Ale heta tolki pijaraŭski balzam na rany samalubstva. Nasamreč, pierakanany ekspert Jarasłaŭ Ramančuk, Maskva budzie jašče macniej davodzić, što depalityzuje svaju enerhietyčnuju palityku. To bok – nijakich preferencyjaŭ chaŭruśnikam, usie roŭnyja.
Što ž da «alternatyvy SHA», to lubaja alternatyva maje sens, kali jana bolej efektyŭnaja. Heta nie pad siłu kupcy dziaržaŭ, što platucca ŭ chvaście ŭsich rejtynhaŭ ekanamičnaje svabody i vyznačajucca drakonaŭskim pratekcyjanizmam.
Tym časam naśpiavajuć ekanamičnyja sankcyi z boku Eŭraźviazu. Užo ŭ vieraśni moža być pryniataje rašeńnie pazbavić Biełaruś handlovych preferencyjaŭ. Hetym tak doŭha strašyli našy niezaležnyja prafsajuźniki, što, jak u toj kazcy pra pastuška dy vaŭka, usie ŭžo źniavierylisia. Ale pracedurny machavik nabraŭ abaroty, i ciapier ŭžo Brusel (jaki, ščyra kažučy, nia nadta rviecca na boj z «apošniaj dyktaturaj Eŭropy», bo režym spraŭna žyvić Stary Śviet salarkaj) stanovicca zakładnikam svaich biurakratyčnych kanonaŭ.
Narastańnie ekanamičnaha nehatyvu pa ŭsich azimutach moža praź niejki hod zmusić urad na raspracoŭku pakietu niepapularnych antykryzisnych zachadaŭ, miarkujuć niezaležnyja analityki. Nia vyklučana, što ich niepryjemnyja prahnozy bolej imaviernyja, čym jak balzamnyja dla dušy biełaruskaha kiraŭnika praroctvy astrołaha Hłoby.
Kamientary